भांगरभूंय | प्रतिनिधी
भलायकी मंत्री विश्वजीत राणेः नगरगांव पंचायती वतीन भलायकी शिबिराचें आयोजन
भांगरभूंय । प्रतिनिधी
वाळपयः गोवा मॅडिकल कॉलेजींत रोबोटीक ऑपरेशन विभाग सुरू करतले. ते उपरांत खूबशा पांवड्याचेर आशिल्ल्यो समस्या सुटाव्यो जातल्यो. शारा वरींच गांवगिऱ्या वाठारांतूय भलायकेच्यो सुविधा मेळप गरजेचें. ते खातीर खूब कडेन ग्रामीण भलायकी केंद्रांच्या माध्यमांतल्यान ह्यो सुविधा दिवपाचो यत्न सुरू केला, अशें भलायकी मंत्री विश्वजीत राणे हांणी सांगलें.
नगरगांव पंचायत इमारतीच्या पयल्या वर्धापन दिसा निमतान आयोजीत केल्ल्या भलायकी शिबिराच्या उक्तावण सुवाळ्यांत मंत्री राणे उलयताले. नगरगांव पंचायत कार्यालयांत ह्या शिबिराचें आयोजन केल्लें. ते निमतान खास रक्तदान शिबीर आयोजीत केल्लें. ताच्या उक्तावण सुवाळ्याक मंत्री राणे हांचे सयत भलायकी खात्याची संचालिका डॉ. गीता काकोडकार, नगरगांवची सरपंच संध्या खाडीलकार, डॉ. शोन, भलायकी अधिकारी रुपचंद्र नावेलकार, गटविकास अधिकारी सूर्याजीराव राणे, सार्थक फावंडेशन सुदेश नार्वेंकार, उपसरपंच रामा खरवत, पंच उर्मिला गांवस, मामू खरवत, राजेंद्र अभ्यंकर, चंद्रकांत मानकर, देवयानी गांवकार, वैजकी अधिकारी डॉ. श्सयाम काणकोणकार, डॉ. अभिजीत वाडकार हाजीर आशिल्ले.
फुडारांत अशे तरेच्या शिबिराच्या माध्यमांतल्यान भलायकी संबंदांत लोकजागृती करतले. गोंयांत थानाच्या कॅन्सराचें प्रमाण हुस्को करपा सारकें आसा. भलायकी खात्यान थानाच्या कॅन्सरा संबंदांतली तपासणी सुरू केल्या. बायला भयणांनी ताचो लाव घेवचो, असो उलो मंत्री राणे हांणी मारलो.
डॉ. गीता काकोडकार हांणी सांगलें, दिसानदीस थानाच्या कॅन्सराचें प्रमाण वाडपाक लागलां. ताका लागून लोकांनी चड करून बायलांनी मुळाव्या पांवड्याचेर आपली तपासणी करून घेवची. भलायकी खात्याच्या माध्यमांतल्यान लोकां खातीर आशिल्ल्या खूबश्या सुविधांचो तांणी ह्या वेळार नियाळ घेतलो. तशेंच गांवगिऱ्या वाठारांत लोकजागृती खातीर अशे तरेच्या शिबिरांची गरज आशिल्ल्याचें तांणी सांगलें.
नगरगांव पंचायत वाठारा खातीर सुसज्ज आनी स्वतंत्र इमारतीची गरज आशिल्ली, ती पुराय जाली. हे इमारतीच्या माध्यमांतल्यान लोकां खातीर खूबश्यो सुविधा मेळटात. फुडारांतूय गांवच्यो समस्या सुटाव्यो करपाक मंत्री राणे हांणी आदार करचो, अशें सरपंच खाडीलकार हांणी सांगलें.
ह्या वेळार वाळपय समाजीक हॉस्पिटला कडेन सलग्न आशिल्ल्या दोतोरांचो मंत्री राणे हांचे हस्तुकीं भोवमान केलो. भोवमान केल्ल्यां मदीं डॉ. शाम काणकोणकार, डॉ. श्वेता कामत, डॉ. मोरजकार, डॉ. सोहील, डॉ. मनद्रे, डॉ. वेणुगोपाल, डॉ.विदीशा, डॉ. प्रणिता, डॉ. तन्मय, डॉ. अनिषा गांवकार, डॉ. विद्देश, डॉ. शेल्डन, डॉ. नताशा, डॉ. साईशा, डॉ. निकिता आनी डॉ. तेरा हांचो आस्पाव आशिल्लो. ह्या वेळार 170 आभा कार्डांची नोंदणी केली. मधुरा वझे हांणी सुत्रसंचालन केलें. पंच राजेंद्र अभ्यंकर हांणी उपकार मानले.
गांवागांवांनी सुरू करतले वेलनेस सेंटरः राणे
गोंयच्या खूबशा वाठारांनी वेलनेस सेंटर सुरू करतले. ते संबंदांत यत्न सुरू केल्यात. सत्तरी म्हालांत 16 वाठारांनी परिपूर्ण भलायकी तपासणी शिबिराचें आयोजन केलां. चड करून 26 फेब्रुवारी सावन ह्या शिबिरांक सुरवात जातली. सत्तरी म्हालांतल्या होंडा आनी वाळपय मतदारसंघांतल्या उसगांवां शारा वरींच भलायकी सुविधा मेळटल्यो. ते दिशेन यत्न सुरू केल्यात, अशें मंत्री विश्वजीत राणे हांणी सांगलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
