भांगरभूंय | प्रतिनिधी
भांगरभूंय । प्रतिनिधी
पेडणेः फुडल्या दोन दिसांत मोपा विमानतळाचेर काळ्या- हळदुव्या टॅक्सीं खातीर सरकारान स्टॅण्ड तयार केलो ना जाल्यार मंगळार 14 फेब्रुवारीक पेडणेच्या शासकीय संकुला सामकार धरणें आंदोलन करपाची शिटकावणी टुगेदर टॅक्सी वेवसायीक संघटनेन दिल्या. तशें लेखी निवेदन तांणी पेडणेच्या उपजिल्होधिकाऱ्याक दिलां.
पेडणे तालुक्यांतल्या काळ्या- हळदुव्या टॅक्सी खातीर स्टॅण्ड उपलब्द करून दिवचो हे मागणे खातीर टॅक्सीवाल्यांनी आंदोलन केल्लें. थळाव्या आमदारांक घेवन मुख्यमंत्री डॉ प्रमोद सावंत हांचे कडेन चर्चा केल्ली. तांका स्टॅण्डाच्या मागणेचें निवेदन लेगीत दिल्लें. मात स्टॅण्ड तयार करपाच्यो कसल्योच हालचाली सुरू जावंक नाशिल्ल्यान धरणें आंदोलन करपाचें तांणी थारायलां. संघटनेचो भास्कर नारूलकार आनी उदय महाले हांणी थळाव्या पत्रकारांक ही म्हायती दिली.
स्टॅण्डा खातीर आंदोलनाक सुरवात केल्ली तेन्ना पेडणेचो आमदार प्रवीण आर्लेकारान हस्तक्षेप करून आमकां चर्चा करपाक मुख्यमंत्र्यां कडेन व्हेल्लें. तांणी बल्यू टॅक्सी स्टॅण्ड दिवपाचें उतर दिल्लें. आतां आमचें पाशेंस आतां सोपलां, अशें नारुलकारान सांगलें.
मोपा विमानतळा खातीर जमीन दिल्ल्या शेतकारांक अजून लुकसाण भरपाय दिली ना. टॅक्सी वेवसायक करपा खातीर तरणाटे फुडें येतात पूण तांचे खातीर विमानतळार स्टॅण्ड तयार करपाक सरकार अनमतना. ताचे खातीर आमकां सरकाराच्या विरोधांत आंदोलन करचें पडटा अशें उदय महालेन सांगलें. सरकारान लागू केल्ल्या जमाव बंदीच्या 144व्या कलमाची आमी पर्वा करचे नात, अशें गजानन पेडणेकारान सांगले.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
