भांगरभूंय | प्रतिनिधी
सुभाष फळदेसाय: शेल्डें केंपेंच्या श्री सांतेरी शांतादुर्गा देवीचे जात्रे निमतान मानेस्तांचो भोवमान
केपें: श्री सांतेरी शांतादुर्गा देवी ही नवसाक पावपी देवी. अंदूं परत देवीचो सुवाळो सुरु जाल्ल्यान ही परंपरा तिगोवन दवरपाक सगळे शेल्डेंकार येसस्वी जाल्ल्यान बारा दीस भाविकांनी केल्ले सेवेचें फळ सगळ्यांक मेळटलें. देवूळ म्हळ्यार फकत भजनाची सुवात न्हय तर तें भक्तीचें मंदीर. तें कलेचें मंदीर, अशीं देवळाचीं विवीध रुपां आमी पळयतात, अशें सांगून जांणी ही जात्रा येसस्वी जावपाक सहकार्य केलां तांकां सगळ्यांक समाजकल्याण मंत्री सुभाष फळदेसाय हांणी परबीं भेटयलीं.
शेल्डें केंपें हांगा बारा वर्सांनी बारा दीस मनोवपी श्री सांतेरी शांतादुर्गा देवीचे जात्रे निमतान खुबश्या मानेस्तांचो भोवमान जालो. ह्या वेळार मंत्री फळदेसाय उलयताले.
ह्या भोवमान सुवाळ्याक भौशीक बांदकाम खात्याचे मंत्री निलेश काब्राल, भाजप अध्यक्ष सदानंद तानावडे, आमदार एलेक्स रेजिनाल्ड, उल्हास तुयेंकार, संकल्प आमोणकार, दाजी साळकार, चद्रकांत कंवळेंकार, नरेद्र सावयकार, दामू नायक, जिल्हो पंचायत वांगडी सिध्दार्थ गांवस देसाय, नगराध्यक्ष डॉ. जेस्मीन ब्रागांझा, विश्वास सावंत देसाय, अध्यक्ष परेश गांवस देसाय आनी हेर हाजीर आशिल्ले.
मंत्री निलेश काब्राल हांणी भोवमान जाल्ल्या मानेस्तांक, तशेंच बारा वर्सांनी जावपी जात्रा भक्तीभावान आनी एवटान मनयल्ले खातीर तांणी सगळ्यांक परबीं भेटयलीं.
ह्या वेळार सदानंद तानावडे हांणी आपले विचार मांडले. समितीन ह्या वेळार खुबश्या जाणांचो भोवमान केलो.
सुत्रसंचालन संजय गांवस देसाय आनी स्वप्नील गावस देसाय हांणी उपकार मानले
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
