भांगरभूंय | प्रतिनिधी
गोविंद गावडेः गोंयच्या लगोरी खेळाचो सर्तीत जातलो आस्पाव
भांगरभूंय प्रतिनिधी
पणजी : राष्ट्रीय पांवड्या वयलीं 37वी राष्ट्रीय खेळां सर्त 1 नोव्हेंबर ते 10 नोव्हेंबर ह्या काळांत गोंयांत जातली. प्रधानमंत्री नरेंद्र मोदी हांचें हस्तुकीं सर्तीचें उक्तावण जातलें, अशें खेळां मंत्री गोविंद गावडे हांणी सांगलें.
सध्या 1 ते 10 नोव्हेंबर ही सर्तीची तारीख थारल्या. प्रधानमंत्री नरेंद्र मोदी हांचे उपलब्धते प्रमाण तारखेंत बदल जावप शक्य आसा.
भारतीय ऑलिम्पिक संघटणेन खेळां सर्तींचें वेळापत्रक निश्चीत केलां. वेळापत्रका प्रमाण 1 नोव्हेंबर ते 10 नोव्हेंबर ही तारीख आसा. चार वांगड्यांच्या शिश्टमंडळान हालीच दिल्लीक भेट दिली. ऑलिम्पिक संघटणेच्यो अध्यक्ष पी टी उषा हांचे सयत शिश्टमंडळान बसका घेतली. खेळां मंत्री गोविंद गावडे हे बसकेक हाजीर आशिल्ले. गोंयांत आयले उपरांत गोविंद गावडे हांणी ही म्हायती दिली. येत्या 15 दिसांत गोंयच्या साधनसुविधांची पळोवळी करपा खातीर आलिम्पिक संघटणेचो पंगड गोंयांत येतलो. सर्तीच्या लोगोचें अनावरण 15 एप्रीलाक जातले.
ही सर्त खेळाच्या 39 प्रकारांत जातली. वेलोड्रोम आनी सायकलींग हे प्रकार दिल्ली जातले. वेलोड्रोम तशेंच सायकलिंगाच्याे सुविधा गोंयांत नात. हाका लागून हे दोन प्रकार दुसऱ्या राज्यांनी जातले. लगोरी ह्या परंपरीक खेळाचो पयलेच खेपे सर्तीत आस्पाव जातलो.
राष्ट्रीय खेळां सर्तीची तयारी फाटलीं बरीच वर्सां सुरू आसा. हाचे पयलीं बरेचे खेपे ही सर्त फुडें धुकलची पडल्या. फातोड्डें स्टेडियमाची दुरुस्ती करपा सयत पेडें, न्हावेलींतल्या स्टेडियमांची दुरुस्ती जाल्या. मिरामार, फातोड्डें, न्हावेली, पेडें, डॉ. श्यामाप्रसाद मुखर्जी स्टेडियमार ह्यो मॅची जातल्यो.
पयलीं साधनसुविधा तयार जाल्यो ना, म्हूण राष्ट्रीय खेळां सर्त फुडें धुकलची पडली. उपरांत कोरोना म्हामारीक लागून राष्ट्रीय खेळां सर्त फुडें धुकलची पडली.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
