भांगरभूंय | प्रतिनिधी
भा रतीय संगीतकार रिकी केजाक हालींच तांच्या ‘डिव्हाइन टाइड्स’ ह्या अल्बमा खातीर ग्रॅमी पुरस्कार फावो जालो. ‘बेस्ट इमर्सिव ऑडियो अल्बम’ विभागांत ब्रिटीश रॉकबँड ‘द पोलिस’ चो ड्रमर स्टिव्हर्ट कोपलँड हांच्या बरोबर हो पुरस्कार तांकां विभागून दिलो. रिकीचो हो तिसरो ग्रॅमी पुरस्कार. हो विक्रम करपी रिकी हो पयलो मूळ भारतीय थारलो.
5 ऑगस्ट 1981 वर्सां अमेरिकेंतल्या नॉर्थ कॅरोलिनात जल्मल्लो आनी मुळ बेंगळुरूचो रिकी हांणी 2015 आनी 2022 वर्सां ग्रॅमी पुरस्कार जिखिल्लो. हो पुरस्कार रिकी आनी कोपलँडाक अमेरिकेंतल्या लॉस एंजिल्सांत हालींच आयोजीत केल्ले कार्यावळींत भेटयलो. रिकीन सोशल मिडियाचेर आपलीं भावनां उक्तायलीं. तिसरो ग्रॅमी पुरस्कार मेळ्ळो, देव बरें करूं. हो पुरस्कार भारताक समर्पित करता अशें तांणी सांगलें.
बेयॉन्सेक 32 वो ग्रॅमी
अमेरिकेची नामनेची गायिका आनी नर्तकी बेयॉन्स हिणें 32 वो ग्रॅमी पुरस्कार मेळोवन नवो इतिहास रचलो. सगळ्यांत चड ग्रॅमी मेळोवपाचो विक्रम बेयॉन्सेन नोंद केला. ताका ‘रेनशां’ खातीर नाच आनी इलॅक्ट्रॉनीक अल्बम पुरस्कार फावो जालो. ब्रिटीश संगीतकार जॉर्ज सोल्टीचो विक्रम बेयॉन्स हिणें मोडलो. सोल्टी हांच्या नांवार 31 ग्रॅमी पुरस्कार आसात. ‘ब्रेक माय सोल’ खातीर सर्वोत्कृश्ट ‘डान्स- इलॅक्ट्रॉनीक’ म्युझिक रेकॉर्डिंग विभागांत आनी ‘प्लास्टीक ऑफ द सोफा’ खातीर सर्वोत्कृश्ट परंपारिक ‘आर अँड बी’ ह्या विभागांत बेयॉन्सेक पुरस्कार मेळ्ळां.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
