भांगरभूंय | प्रतिनिधी
येजमान भारत आनी ऑस्ट्रेलिया ह्या पंगडां मदीं आयच्यान चार टॅस्टींचे माळेक सुरवात जाता. इतिहासाचेर नदर मारली जाल्यार 2004 उपरांत ऑस्ट्रेलियेक भारतांत एकूय माळ जिखपाक जमूंक ना. ताचे आदीं तीन दसकां परस चड काळां सावन ताच्या हाताक निर्शेणीच लागल्या. पूण, ऑस्ट्रेलिये खातीर मोठो धपको बसपी गजाल म्हणल्यार भारतान ऑस्ट्रेलियेंत दोन खेपे बॉर्डर-गावस्कर माळ जिखल्या.निमाणे खेपे 2014-15त ऑस्ट्रेलिये आड हार घेवची पडिल्ली. पूण, भारताक ताच्याच मैदानाचेर हारोवप ऑस्ट्रेलिये खातीर कठीण जाला.
ज्या चार मैदानांचेर मॅची जातल्यो, त्या मैदानांचेर स्पिनरांक मजत मेळटली अशी आस्त ऑस्ट्रेलियेच्या पंगडाक आसा. नागपूरांतल्या जामथाच्या व्हीसीए मैदानाची खेळपट्टी स्पिनरांक पयल्या दिसा सावन मजत करपाची शक्यताय आसा. तशें घडलें जाल्यार ऑस्ट्रेलिये खातीर ही एक वायट गजाल थारुये.
खेळपट्टी, सुकी विकेट आनी आमच्या पंगडाक कितलें व्हड आव्हान आसतलें हे विशीं विचार करिना. असो विचार केलो जाल्यार आमचेर अतिरिक्त चेपण येवपाक शकता अशें ऑस्ट्रेलियेचो फास्ट बॉलर आनी मुखेली पॅट कमिन्सान पत्रकारां कडेन उलयतना म्हणलें.
हाचे आदीं आयिल्ल्या पंगडांत आनी सध्याच्या पंगडांत खूब फकर आसा. आमी जैता विशीं विचार करीत आसात. भारताची भोंवडी कठीण आसतली हें आमकां पयलींच खबर आसा. खरें सांगपाचें जाल्यार भारत संवसारांतल्या उत्कृश्ट पंगडांतलो एक आसा. घरच्या मैदानाचेर ताका हारोवप खूब कठीण. पूण, आमी सर्वोत्कृश्ट प्रदर्शन करपाक इत्सूक आसात अशें ताणें मुखार म्हणलें.
ऑस्ट्रेलियेची आस्त टॉड मर्फी सयत नॅथन लियोन हाचेर आसा. ह्या स्पिनरांचो भारतांतलो स्ट्रायक रेट बरो आसा. पूण, भारताक संकश्टांत घालपाक ऑस्ट्रेलियेन सदांच फास्ट बॉलींग विभागाचेर आपलो विस्वास दवरला. हे खेपे लेगीत तशेंच चित्र आसतलें अशें दिसता.
आयचे टॅस्टींत कोणांकोणांक खेळपा विशीं निर्णय जाला अशें कमिन्सान सांगलें. पूण, तीन फास्ट बॉलर आनी दोन स्पिनरांक खेळयतले काय स्पिन विभागाक आनीक घटसाण दितले हे विशीं कांयच निश्चीत सांगूंक ना.
ऑस्ट्रेलियेचे बॉलर दुखापती कडेन झुजतात. जोश हेजलवूड अजून पुर्ण बरो जावंक ना. फाटल्या म्हयन्यांत दक्षीण आफ्रिके आडचे सिडनी टॅस्टींत खेळटना ताका दुखापत जाल्ली. मिचेल स्टार्क आनी अश्टतासांचो खेळगडो कॅमरुन ग्रीन लेगीत पुर्ण बरे जावंक ना.
एके वटेन ऑस्ट्रेलिया दुखापती कडेन झुजता जाल्यार दुसरे वटेन भारताच्यो स्वताच्यो कांय समस्या आसात.
फकत घरच्या मैदानां वयलो रॅकॉर्ड कायम राखपाकूच न्हय जाल्यार वर्ल्ड टॅस्ट चॅम्पियनशीप सर्तीचे फायनलींत सुवात मेळोवपाक ताका ही माळ व्हडा फरकान जिखपाक जाय. ऑस्ट्रेलियेन आदींच फायनलींतली सुवात निश्चीत केल्या.
वर्ल्ड टॅस्ट चॅम्पियनशीप सर्तीचे फायनली विशीं रोहित शर्मा म्हणटा. आमी चड मुखा वयल्या गजालींचेर लक्ष दिना. सध्या नागपूर टॅस्टी विशीं आमी विचार करीत आसात अशें ताणें सांगलें.
सध्या ड्रेसींग रुमांत वर्ल्ड टॅस्ट चॅम्पियनशिपीचे फायनली विशीं कांय चर्चा जावंक ना. सध्या आमी बॉर्डर-गावस्कर माळेचेर लक्ष्य केंद्रीत केलां. आमचें लक्ष्य आयच्यान सुरू जावपी मॅचीचेर आसा अशें ताणें मुखार सांगलें.
भारता मुखार निवड करपाची समस्या आसा. चारांतल्या खंयच्या तीन स्पिनरांक खेळप हो मोठो प्रस्न आसा. रवींद्र जडेजा पुर्ण तंदुरुस्त आसा पूण, फाटल्या काय म्हयन्यां सावन तो खेळूंक ना. आर आश्विनाचें खेळप लागीं लागीं निश्चीत आसा. तिसरो स्पिनर म्हणून अक्षर पटेल काय कुलदीप यादव हाका खेळवचो हे विशीं अजून निमाणो निर्णय जावंक ना.
फाटले घरच्या मैदानाचेर जाल्ले माळेंत अक्षर पटेलान उत्कृश्ट प्रदर्शन केल्लें, जाल्यार कुलदीप यादवान बांगलादेशाचे भोंवडेर जबरदस्त बॉलींग केल्ली.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
