भांगरभूंय | प्रतिनिधी
मंत्री, आमदार, अधिकाऱ्यांक कामाचो तपशील दिवपाची वेवस्था
भांगरभूंय । प्रतिनिधी
पणजी : प्रधानमंत्री नरेंद्र मोदी हांच्या नमो अॅपा प्रमाण गोंय सरकार सीएम अॅप सुरू करपाचो विचार करता. मंत्री, अधिकारी तशेंच आमदारांक आपल्या कामाचो तपशील ह्या अॅपाचेर घालपाची वेवस्था आसतली.
पणजे मंगळारा स्वयंपूर्ण इश्ट तशेंच म्हाल समन्वय अधिकाऱ्यां खातीर प्रशिक्षण आनी दिशादर्शनाची कार्यावळ जाली. हे कार्यावळीक मुखेल सोयरे म्हूण उलयतना मुख्यमंत्री डॉ. प्रमोद सावंत हांणी ही म्हायती दिली.
प्रधानमंत्र्यांच्या नमो अॅपाचेर खासदार, राज्यांचे मुख्यमंत्री तशेंच पक्षाचे कार्यकर्ते आपल्या वावराचो तपशील अॅपाचेर घालतात. मुख्यमंत्री अॅपाचेर स्वयंपूर्ण इश्टांक आपल्या कामाचो तपशील सादर करप शक्य जातलें. हाका लागून कामाची सर्वोत्कृश्ट पद्दत तशेंच खंयचे पंचायतींत कसल्यो कार्यावळी चलतात, तांची म्हायती मेळटली.
राज्यांतल्या सर्वोत्कृश्ट 100 स्वयंपूर्ण इश्टांक वर्सुकीं बोनस मेळटलो. केंद्राच्या ल्हान उद्देग मंत्रालयाच्या येवजणे खाला राज्यांत 12 म्हालांत परंपरीक उद्देगांचे पुनरूज्जीवन करपा खातीर क्लस्टर स्थापन जातलें.
हे कार्यावळीक नियोजन खात्याचे संचालक विजय सक्सेना आनी हेर अधिकारी हाजीर आशिल्ले. गोंयांत 2 ऑक्टोबर 2020 हे दिसा स्वयंपूर्ण गोंय मोहीम सुरू जाली. हे मोहिमेक आतां तीन वर्सां पुराय जातली. देशांतले सगल्यांत नितळ शार म्हूण इंदोर शाराचो उल्लेख जाता. स्वयंपूर्ण मोहिमे खातीर गोंयचो उल्लेख जाता. हे मोहिमेची प्रधानमंत्री नरेंद्र मोदी हांणी लेगीत ‘मन की बात’ कार्यावळींत तोखणाय केल्या. स्वयंपूर्ण इश्टा सयत पंच, सरपंच हांच्या सहकार्याक लागून स्वयंपूर्ण गोंय मोहिमेचो पयलो पांवडो येसस्वी जाला. स्वयंपूर्ण इश्ट शेनवार सयत आयतारा लेगीत काम करतात. स्वयंपूर्ण इश्टांक पंचायत वेंचणुके खातीर हे मोहिमेचो लाव जातलो. खूबशे गोंयकार बांदकाम उद्देगांत सुपरवायजर म्हूण नोकरी करतात. कामगार कल्याण मंडळाच्यो बऱ्योच येवजण्यो आसात. सुपरवायजर म्हूण नोकरी करतल्यांनी कामगार खात्या कडेन नोंदणी करपाची गरज आसा, अशें मुख्यमंत्री डॉ. प्रमोद सावंत हांणी सांगलें.
तरणाट्यांनी कुशळटायेचें शिक्षण घेवप गरजेचें
स्वयंपूर्ण गोंय मोहिमेच्या पयल्या पांवड्यार उदक, वीज, नितळसाण, दिव्यांगां खातीर सुविधा अशा 10 मुद्यांचेर लक्ष केंद्रीत केल्ले. मोहिमेच्या दुसऱ्या पांवड्यार आतां कुशळटाय विकासाचेर भर आसा. प्रधानमंत्री नरेंद्र मोदी हांणी सत्तेंत आयले उपरांत पयलेच खेपे कुशळटाय विकास मंत्रालय स्थापन केलें. ह्या मंत्रालया वरवीं गोंयांत तरेकवार अभ्यासक्रम सुरू जाल्यात. हे अभ्यासक्रम पुराय केल्ल्या 99 टक्के विद्यार्थ्यांक नोकरी मेळ्ळ्या. तशेंच हातूंतल्या 80 टक्के विद्यार्थ्यांक सरकारी नोकरी मेळ्ळ्या. धावी नापास तशेंच जे पदवीधर बेकार आसात, तांणी कुशळटाय अभ्यासक्रमा खातीर नांव नोंदणी करपाक हरकत ना. स्वयंपूर्ण इश्टांनी बेकार तरणाट्यांचो सोद घेवपाची गरज आसा.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
