भांगरभूंय | प्रतिनिधी
डॉ. नूतन देवः ज्येश्ठ नागरिकांचो खेळां महोत्सव उमेदीन
भांगरभूंय । प्रतिनिधी
फोंडें: भलायकी ही मनशाच्या अस्तित्वा कडेन जुडिल्ली प्रक्रिया. जे मेरेन भलायकी मनशाक सांगात दिता ते मेरेनूच उमेद आनी खोशयेची अणभुती मेळटा. हेच खातीर आपले भलायके कडेन कसलीच तडजोड करूं नाकात. तेचवरी आपले भलायके खातीर दुसऱ्यांचेर निंबून रावूं नाकात, अशें निवृत्त भलायकी अधिकारी तशेंच गोंयची कवयित्री डॉ. नूतन देव हांणी सांगलें.
फोंडेंचो प्रोबस क्लब हील टावन, प्रोबस क्लब ट्रस्ट आनी माधवराव ढवळीकार ट्रस्ट हांच्या जोडपालवान आयोजीत केल्ल्या ज्येश्ठ नागरिकांचें वर्सुकी संमेलन आनी खेळां महोत्सवाचें उक्तावण केले उपरांत डॉ. देव मुखेल सोयरी म्हूण उलयताली.
कुर्टीच्या सरकारी खेळां प्रकल्पाच्या मैदाना वयल्या माटवांत हो सुवाळो जालो. ह्या वेळार माचयेर माधवराव ढवळीकार ट्रस्टाचे पदाधिकारी दिलीप ढवळीकार, हिलदारी संस्थेचे मुखेली विजय राठोड, प्रोबस क्लबाचे अध्यक्ष अशोक तरळे, प्रोबस क्लब ट्रस्टाचे अध्यक्ष मनोहर तिळवे, जयंत आडपयकार आनी भांडारी नगहरी नायक हाजीर आशिल्ले.
स्वताचे भलायके वांगडा समाजाचे भलायके कडेनूय लक्ष दियात. भलायकी विशींच्यो समाजीक कागाळी सोडोवचे खातीर सदांच तयार रावात. ढवळीकार ट्रस्ट अशा वावरा खातीर कार्यकर्त्यांक आदार करतलो, अशें उतर दिलीप ढवळीकार हांणी दिलें.
समाज वावुरपी तशेंच माधवराव ढवळीकार ट्रस्टाचे मिथील ढवळीकार हांचे हस्तुकीं इनामां भेटयलीं. ह्या वेळार खेळा प्रशिक्षक निलम मयेंकार तशेंच हेर मानेस्त हाजीर आशिल्ले. यशवंत वेरेंकार, उल्हास कुंकळीकार, प्रकाश नायक, प्रकाश कुरणे, मार्टीन पिरीस, रघुवीर नायक, रितीन परेरा, प्रतिक्षा वेर्लेंकार, डॉ. नूतन देव, पल्लवी गुणाजी, सुमन नायक, आग्नेल फोन्सेका, नरहरी नायक, भगवंत नायक, दुर्गाकुमार नावती, बाळकृष्ण वर्तीकार, एम. के. पाटील, गुरुदास बांदोडकार, वसंत पाटील हांणी विवीध खेळांनी इनामां जोडलीं.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
