भांगरभूंय | प्रतिनिधी
पणजीः राष्ट्रीय मोलावणी आनी मान्यता परिशद म्हणल्यार नॅशनल असेसमेंट अॅण्ड अॅक्रिडिटेशन कौन्सील बंगळुरू (नॅक) समितीन सरकारी वाणिज्य आनी अर्थशास्त्र म्हाविद्यालय, बोर्डाक नॅक ‘ए’ मानांकन जाहीर केलां.
अंदूं 2 आनी 3 फेब्रुवारीक नॅक समितीन ह्या म्हाविद्यालयाक भेट दिवन म्हाविद्यालयाची मोलावणी केल्ली. ते मोलावणेच्या आदारान समितीन ह्या म्हाविद्यालयाक 3.23 च्या सीजीपीए स्कोरा सयत ‘ए’ मानांकनाक लागून गोंयांत सरकारी वाणिज्य आनी अर्थशास्त्र म्हाविद्यालय बोर्डाचें सगळे वटेन कवतूक जाता आनी परबीं मेळटा.
सरकारी वाणिज्य आनी अर्थशास्त्र म्हाविद्यालयाक भेट दिल्ले नॅक समितींत डॉ. बाबासाहेब आंबेडकर मुक्त विद्याविठ तेलंगणाचे आदले कुलगुरू सीतारामराव कुसुंबा, सिक्कीम विद्यापिठाचे डॉ. सुधांशू शेखर महापात्रा, महाराष्ट्राच्या अभियांत्रिकी आनी तंत्रज्ञान म्हाविद्यालयाचे आदले प्राचार्य डॉ. अनंत बी. मराठे हांचो आसपाव आशिल्लो.
सरकारी वाणिज्य आनी अर्थशास्त्र म्हाविद्यालय बोर्ड ह्या म्हाविद्यालयान अध्यापन- अध्ययन प्रक्रियेंत आयसीटीचो आस्पाव करपांत म्हत्वाची भुमिका घेतल्या. तशेंच ह्या म्हाविद्यालयांतले सगळे तासिका वर्ग हे स्मार्ट क्लासरूम आसा. अत्याधुनीक तंत्रज्ञानाचो वापर अध्यापन- अध्यन प्रक्रियेंत करतात. म्हाविद्यालयान खूबशे दर्जेदार उपक्रम चालीक लावन ते अंमलांत हाडल्यात. म्हाविद्यालयान सगळ्या माळ्यांचेर अॅटमॉस्फोरीक वॉटर जनरेटर बसयल्यात. स्मार्ट नेव्हिगेशन सिस्टम, स्मार्ट डिजिटल गार्डन, व्हर्टिकल गार्डन ह्या सगळ्या उपक्रमां खातीर सरकारी वाणिज्य आनी अर्थशास्त्र म्हाविद्यालय बोर्ड ह्या म्हाविद्यालयान क्यूआर कोडींग सिस्टमीचो वापर केला.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
