भांगरभूंय | प्रतिनिधी
म्हापशें: ओशेल-शिवोले शापोरा न्हंयेंतल्यान उत्खनन केल्ली 80 घन मिटर रेंव बार्देस मामलेदार, खण खातें आनी पुलिसांनी धाड घालून जप्त केली. उपरांत ही सगली रेंव परतून न्हंयेंत उडोवन तिचो विलो लायलो. ह्या जप्त केल्ले रेंवेचे मोल सुमार देड लाख रुपया जाता.
सोमारा फांतोडेर 3 वरांच्या सुमाराक ही धाड घाली. धाड घालतकूच घडणूक थळार आशिल्ल्या कामगारांनी धांव मारली. सुमार 500 मिटर अंतराचेर फाटलाग करून लेगीत ते सांपडले नात.
ओशेल-शिवोले रेंव उत्खनन सुरू आशिल्ल्याची म्हायती जिल्होधिकाऱ्यांक मेळिल्ली. तांच्या निर्देशा प्रमाण ही धाड घाली.
बार्देसचे मामलेदार प्रवीण गांवस, खण खात्याचे सहाय्यक भुगर्भशास्त्रज्ञ ओंकार गांवकार, तलाठी सुमीत शिरोडकार हांणी शिवोली दर्यादेग सुरक्षा पुलीस आनी हणजूण पुलिसांचे मजतीन ही धाड घाली.
ह्या वेळार सुमार 80 घन मिटर रेंव सांठाेवन दवरिल्ली सांपडली. ही सगली रेंव जप्त केली आनी पंचनाम्या उपरांत सगली रेंव जेसीबीच्या आदारान परतून न्हंयेच्या पात्रांत उडोवन तिचो विलो लायलो.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
