भांगरभूंय | प्रतिनिधी
इंडियन सुपर लिगेंत (आयएसएल) काल जाल्ले मॅचींत हैदराबाद एफसीन जबरदस्त खेळाचें प्रदर्शन घडयतना आदलो वस्ताद मुंबय सिटीक 1-1 असो बरोबरींत आडायलो. हैदराबादान एका गोलान फाटीं पडल्या उपरांत लेगीत हार मानूंक ना आनी मॅच 1-1 अशी बरोबरींत सोडयली.
परेरा डियाझान पॅनल्टीचेर 23व्या मिनटाक गोल करून मुंबय सिटीचें खातें उगडलें, जाल्यार हितेश शर्मान 65व्या मिनटाक बरोबरीचो गोल केलो. मुंबय सिटीक बरोबरीचेर समाधान मानचें पडलें आसले तरी फाटल्या 17 मॅची सावन चालू आशिल्ली अपराजीत माळ कायम राखून गुणतकट्यांतली पयल्या दोनांतली सुवात निश्चीत केली. मुंबय सिटीचे 43 गूण आनी हैदराबादाचे 36 गूण जाले.
अंदूंच्या हंगामांतले दोन बळिश्ट पंगड एकामेका आड खेळपाचे आशिल्ल्यान मुंबय फुटबॉल एरेनाचेर प्रेक्षकांनी गर्दी केल्ली. प्रेक्षकांचे अपेक्षे प्रमाण दोनूय पंगडांनी जबरदस्त सुरवात केली. 21व्या मिनटाक लालिआंझुआलाच्या क्रॉसाचेर बिपीन सिंगान हेडरा वरवीं गोल गोलपोस्टा वटेन धाडलो. पूण, निखील पुजारान हातान गोलपोस्टांत वचपी बॉल आडायलो. ताका लागून निखिलाक हळडुवें कार्ड मेळ्ळें. हाचे खेरीत
मुंबय सिटीक पॅनल्टी दिली. पॅनल्टीचेर परेरा डिझायनान गोल करून आपल्या पंगडाक 1-0 अशी आघाडी मेळोवन दिली.
परेराचो अंदूंच्या हंगामांतलो हो 10वो गोल थारलो आनी ताणें सगल्यांत चड गोल करपी क्लेयटन सिल्वा आनी इकर गौरात्क्सेना हांचे कडेन बरोबरी सादली.
मुंबय सिटीन अंदूंच्या हंगामांत आघाडी घेतल्या उपरांत एक लेगीत मॅच वगडावंक ना. पूण, त्याच वेळार हैदराबाद एफसी मॅच हारता अशें दिवपी 12 मॅचींतल्यान 12 गूण जोडल्यात. ताका लागून हे मॅचींत कितें जाता हाची सगल्यांक उमळशीक लागिल्ली.
एका गोलान फाटीं पडल्या उपरांत हैदराबादाक आक्रमक खेळ सुरू करचो पडलो. 31व्या मिनटाक मोहम्मद यासीरान बरोबरी करपाची संद वगडायली. 42व्या मिनटाक मुंबय सिटीच्या संजीव स्टॅलिनान टी शर्ट ओडून रोहित दानूक सकयल उडयलो. ऱॅफ्रीन सुरवातीक संजीवाक रॅड कार्ड दाखयलें. पूण उपरांत बाकीच्या रॅफ्रीं कडेन चर्चा करून तांणी हो निर्णय बदल्लो आनी संजीवाक यॅल्लो कार्ड दाखयलें. रोहित दानूक उडोवंक नाशिल्लो जाल्यार हैदराबाद बरोबरीचो गोल करपाक शकतलो आसलो. मुंबय सिटीन ल्हान ल्हान पास दिवन सुंदर खेळ केलो.
हैदराबाद जबरदस्त प्रतिहल्लो करतलो हें अपेक्षीत आशिल्लें. पूण, मुंबय सिटीन आपलो शेक दवरलो. 60व्या मिनटाक बिपीन सिंगान बॉल घेवन पॅनल्टी वाठारांत घुस्पाचो यत्न केलो. पूण, अखेरची दिका दिवचे आदींच हैदराबादाच्या डिफॅण्डरान बॉल भायर मारलो.
फुडल्या मिनटाक छांग्टे बॉल घेवन पॅनल्टी वाठारांत शिरलो आनी हैदराबादाचो गोलकीपर आनी छांग्टे हांचे मदीं वन ऑन वन परिस्थिती निर्माण जाली. अशें आसतना लेगीत निखिलान ताका उडयलो. ताका लागून छांग्टेन फावलीच मागणी केली. पूण, रॅफ्रीन कांयच प्रतिक्रिया दिवंक ना. 65व्या मिनटाक हितेश शर्मान हैदराबादाक बरोबरीचो गोल करून दिलो. हितेशाक आडावपाक मुंबय सिटीचो गोलकीपर फुर्बा लचेंपा मुखार आयलो. पूण, हितेशान बॉल ताचे तकले वयल्यान मारून गोलपोस्टांत घालो.
स्टिव्हर्टाक 83व्या मिनटाक गोल करपाची बरी संद आशिल्ली. पूण, हैदराबादाचो गोलकीपर आडवो आयलो आनी बॉल आडायलो. अखेरेक मॅच 1-1 अशी बरोबरींत सुटली.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
