म्हापशेंच्या चिकन कोयराचेर कुंडय प्रक्रिया

भांगरभूंय | प्रतिनिधी

13 फेब्रुवारीक पालिका मंडळाची चिकन सेंटर धनयां वांगडा बसका

भांगरभूंय । प्रतिनिधी

म्हापशें: म्हापशें शारांतल्या चिकन विक्री दुकानांची संख्या खूब व्हड आसा. शारांत दर दिसा देड ते दोन टन चिकन कोयर (वेस्ट) तयार जाता. ह्या कोयराचो विलो लावचे खातीर कुंडयचे एके कंपनीचो आदार घेवपाचो निर्णय पालिकेन नगराध्यक्ष प्रिया मिशाळ हांच्या फुडारपणा खाला घेतला.

म्हापशें पालिकेन ह्या चिकन कोयरा समस्येचेर उपाय काडचे खातीर आतां हो कोयर थेट कुंडयचे ‘बायोटीक’ हे बायोटीक वेस्ट सोल्युशन प्रा. लि. कंपनीच्या आदारान ताचो विलो लावपाची येवजण आंखल्या. ते खातीर 13 फेब्रुवारीक म्हापशेंच्या सगळ्या चिकन सेंटर दुकानांच्या धनयांची जोडबसका आयोजीत केल्या.

नुस्त्यां मार्केटांतलो चिकन कोयर सध्या पालिका उखलता. ते भायर शारांत हेर वाठारांनी चिकन सेंटरां चालू आसात. कांय जाण हो कोयर पालिके कडेन दिनासतना भायले भायर मेळत थंय उडयतात. ताका लागून हो कोयराचो प्रस्न शारांत गंभीर जावपाक लागला. हाची दखल घेवन नगराध्यक्ष मिशाळ हांणी ह्या चिकन कोयराच्या वेवस्थापनाचेर भर दिला. ते प्रमाण ह्या कोयराचो थेट खाजगी कंपनी वतीन विलो लावपाचो पालिका मंडळाचो विचार आसा.

हे बसकेंत पालिका वाठारांतल्या सगळ्या चिकन सेंटर दुकानांच्या धनयांक आपयतले. ह्या उपक्रमा विशीं तांकां म्हायती दितले. बायोटीक कंपनी कडेन कंत्राट करून चिकन सेंटर धनयांनी दुकानांत तयार जावपी कोयर थेट हे कंपनी कडेन दिवचो पडटलो. जर हाका एकादो तयार जालो ना जाल्यार ताचेर कारवाय करपाची तयार पालिकेन दवरल्या. गरज पडली जाल्यार ताचें दुकान मोडून लेगीत उडयतले. हे बसकेंत चिकन कोयराचो प्रतिटन किलो दर निश्चीत करपा पासून हेर विशयांचेर चर्चा जातली.

पालिकेन फुडल्या सप्तका भितर शारांतल्या सगळ्या चिकन सेंटर दुकानांची म्हायती एकठांय करपाचें थारायलां. सध्या पालिके कडेन शारांतल्या चिकन सेंटरांचो अधिकृत आंकडो ना. पूण शारांत सुमार 80 ते 100 दुकानां आत. ह्या चिकन सेंटरांचो वट्ट आंकडो मेळोवचे खातीर पालिका पर्यवेक्षकांक बुधवारा 8 फेब्रुवारी मेरेन सर्वे करपाचो आदेश दिला. चिकन सेंटरांत कोंबयां खातीर घूड बांदतात. ताका लागून तांच्या संडासाचें प्रमाण लेगीत वाडटा. कोंबयो कापले उपरांत पाखां, मांस, हाडां अशे तरेचो कोयर व्हड प्रमाणांत तयार जाता. मार्केटांतल्या दुकान धनयां कडल्यान हो कोयर पालिका उखलता. ह्या कोयराचेर पालिकेच्या आसगांव पठारा वयल्या कोयर डंपर पॉयंटाटेर प्रक्रिया करतात, पूण हे प्रक्रियेक खूब वेळ लागता. जाल्यार हेर चिकन सेंटरांतले भोवतेक दुकान धनी उक्ताडार कोयर उडयतात. ताका लागून पालिकेन हें पावल उखल्लां.

सरकाराच्या निर्देशा प्रमाण पावलः मुख्याधिकारी

चिकन कोयरा सबंदांत राज्य सरकाराच्या निर्देशा प्रमाण आमी कोयर वेवस्थापना खातीर पावल उखलपाचो निर्णय घेतला. सध्या खूब जाण उक्ताडार कोयर उडयतात. ताका लागून शारांत घाण पातळटा. ते खातीर खाजगी कंपनींचो आदार घेवपाचो हो उपक्रम हातांत घेतले. संबंदीत बसके उपरांत सगळ्यो गजाली निश्चीत जातल्यो, अशी म्हायती मुख्याधिकारी अमितेश शिरवयकार हांणी दिली.

कोयर वेवस्थापनांत सुसुत्रता हाडपाची येवजणः नगराध्यक्ष

शारांतल्या कोयर वेवस्थापनांत सुसुत्रता हाडपाचे येवजणे प्रमाण हें पावल उखल्लां. शारांत दिसाक उण्यांत उणो देड ते दोन टन चिकन कोयराची निर्मिती जाता. ह्या कोयराची योग्य विलो लावचे खातीर खाजगी कंपनी कडेन कंत्राट करून ताचेर उपाय काडपाचो विचार आसा. ते प्रमाण 13 फेब्रुवारीक चिकन सेंटर धनयां वांगडा बसका आपयल्या, अशें नगराध्यक्ष प्रिया मिशाळ हांणी दिली.