भांगरभूंय | प्रतिनिधी
फोंडें: फोंडें पालिका मंडळ वेंचणुकेचे सध्या वेध सुरू जाल्यात. खूबशे आदले आनी सध्याचे नगरसेवक मोर्चेबांदणी करपांत गुल्ल जाल्यात. तातूंत कांय प्रभागांनी बदल घडोवचे खातीर रॉय नायक हांकां वेंचणूक रिंगणांत देंवोवपा खातीर नेटाची मागणी सुरवात जाल्या. फोंडें पालिकेचे वेंचणुकेंत रॉय नायक देंवले जाल्यार विरोधकांक धपको बसपाची चड शक्यताय निर्माण जाल्या.
फोंडें पालिका मंडळाची वेंचणूक एप्रील वा मे म्हयन्यांत जातली. इत्सूक उमेदवारांनी मतदारांक मेळपाक सुरवात केल्या. पूण कांय प्रभागांतल्या कार्यकर्त्यांनी उदरगतीच्या कामांक चालना दिवंक नाशिल्ल्यान सुमार 5-6 प्रभागांतल्या खूबशा कार्यकर्त्यांनी हालींच रॉय नायक हांकां वेंचणूक लडोवपा खातीर आगरो केला. कार्यकर्त्यांच्या आगऱ्याक लागून रॉय नायक निश्चीत पालिका वेंचणूक लडयतले अशें कळ्ळां.
फोंडें पालिकेंत 15 प्रभाग आसात. रॉय नायक खंयच्या प्रभागांतल्यान वेंचणूक लडयतले ते संबंदांतली म्हायती अजून मेळूंक ना. रॉय नायक वेंचणूक रिंगणांत देंवल्यार विरोधकांची अदीक गोची जावपाची शक्यताय आसा. कारण रॉय नायक सध्या राजकारणा पासून पयस आसले तरीय तांचो फोंडें शारांतल्या तशेंच कुर्टी- खांडेपार पंचायत वाठारांतल्या लोकां कडेन सतत संपर्क आसा. फाटले विधानसभा वेंचणुके वेळार सध्याचे शेतकी मंत्री रवी नायक हांकां जैत मेळोवन दिवपांत रॉय नायक हांणी पड्ड्या फाटल्यान म्हत्वाची कामगिरी केल्ल्यान कार्यकर्त्यांची उमेद वाडल्या.
फोंडें पालिका वेंचणुकेंत हे खेपे खूबशे तरणाटे देंवपाचे आसात. तातूंत आदले कांय नगरसेवक वेंचणूक लडयतले. हाका लागून ही वेंचणूक अटीतटीची जावपाची शक्यताय आसा.
खूबशा प्रभागांतले कार्यकर्ते आपणाक वेंचणूक रिंगणांत देंवपाचो आगरो करतात. पूण अजून वेंचणूक लडोवपा संबंदांत निर्णय घेवंक ना.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
