भांगरभूंय | प्रतिनिधी
सुभाष शिरोडकारः पार्शेच्या खाजन गुंडो बांदाची पळोवणी, पुनर्बांदणी करपाचें उतर
भांगरभूंय । प्रतिनिधी
पेडणें: शेती वेवसाया खातीर सरकार वेगवेगळे पद्दतीन वेगवेगळ्यो येवजण्यो चालीक लायता. ताचो लाव लोकांनी घेवपाक जाय. तशेंच जे पद्दतीन बांदांची पुनर्बांदणी करतना ताचो वापर शेती वेवसायाक चालना दिवचे खातीर यत्न करपाक जाय, अशें शिंपणावळ मंत्री सुभाष शिरोडकार हांणी सांगलें.
पार्सेच्या खाजन गुंडो बांदाची पळोवणी केले उपरांत थळाव्या पत्रकारां कडेन मंत्री शिरोडकार उलयताले. ह्या वेळार मांद्रेंचे आमदार जीत आरोलकार, पार्सेची पंच सुनिता बुगडे देसाय, पंच नायक, अभियंते आनी थळावे लोक हाजीर आशिल्ले.
हालींसराक शेतां पडीक दवरपाचीं प्रकरणां दिसतात. तीं शेतां कसचे खातीर आनी शेतकारां खातीर आशिल्ल्यो वेगवेगळ्यो येवजण्यो शेतकारां मेरेन पावोवप खूब गरजेचें आसा. एकाद्या शेतकारान आपले शेत जमनींत जर वेगळे पद्दतीन उपक्रम चालीक लायलो जाल्यार ताका उर्बा दिवचे खातीर पत्रकारांनी तशे पद्दतीचें लेखन करचें, असो उलो मंत्री शिरोडकार हांणी पत्रकारां कडेन उलयतना मारलो.
ह्या वेळार थळाव्या पत्रकारांनी मंत्री शिरोडकार हांकां आरथे- परथे प्रस्न विचारून तांचे कडल्यान जापो घेवपाचो यत्न केलो. आडावल्लें काम वा निकृश्ट दर्जाच्या कामा खातीर कंत्राटदाराचेर कसली कारवाय करतले, असो प्रस्न पत्रकारांनी मंत्री शिरोडकार हांकां विचारलो. ताचेर जाप दितना तांणी सांगलें, कंत्राटदाराक कशे तरेचें काम दिल्लें आनी ताचो दुरुस्तीचो काळ सोंपला काय ना ताची पळोवणी करतले. ह्या सगळ्या गजालींचेर पत्रकारांनीच काम करचें, असो मंत्री शिरोडकार हांणी उलो मारलो आनी आपल्या अधिकाऱ्यांक साल्वार करपाचो यत्न केलो.
कोट्यांनी रुपया खर्च करून खाजन गुंडो बांदाचें बांदकाम केलें, पूण आयज मेरेन शेतकारांनी शेता पडीक दवरल्यात, अशें पत्रकारांनी मंत्र्याचे नदरेक हाडून दिलें. हाचेर उपाय काडटना मंत्री शिरोडकार हांणी सांगलें, शेता पडीक कित्याक दवरतात, हाचेर पत्रकारांनी उजवाड घालचो. जर कामां जाय नात जाल्यार पत्रकारांनी आवाज काडचो, अशें तांणी सांगलें.
पंचायत मंडळ, जिल्हो पंचायत वांगडी आनी विवीध खातीं मेळून जोडपालवान एकादो प्रकल्प उबारतात त्या प्रकल्पाची तांणी देखभाल करची. प्रकल्पाचो बरो वापर जातलो, हाचेरूय तांणी नदर दवरची. थळावे आमदार जीत आरोलकार हांचे विनवणे वयल्यान ह्या बांदाची पुनर्बांदणी तशेंच दुरुस्ती करतले. अधिकाऱ्यांक तशी सुचोवणी केल्या. मार्च- एप्रीलांत शिगमो उत्सव जातलो. पेडणें म्हालांतली शिगम्याची मिरवणूक ह्या वाठारांत आयोजीत करपाचो विचार आसा. ते खातीर ह्या बांदाचें काम लेगीत बेगीन हातांत घेतले, अशें शिरोडकार हांणी सांगलें. आमदार आरोलकार हांणी सांगलें, खाजन गुंडो बांदाची पुनर्बांदणी आनी दुरुस्तीचें काम हातांत घेवचे, अशी आपणे शिंपणावळ मंत्री शिरोडकार हांकां विनवणी केल्ली. ते प्रमाण तांणी ह्या वाठाराची पळोवणी केल्या आनी कामा संबंदांत अधिकाऱ्यांक म्हत्वाच्यो सुचोवण्यो केल्यात. ह्या बांदाक लागून शेतां पडीक उरल्यांत तीं पुनर्जिवीत करचे खातीर आपूण यत्न करतां.
एप्रीलांत कला महोत्सवः जीत आरोलकार
अंदूं पार्श्यां शिगम्याची मिरवणूक आयोजीत करपाचो विचार आसा. ताका लागून ह्या बांदाची दुरुस्ती करतनाच मानशेंचेय बांदकाम करतले. तशेंच एप्रीलांत एक बऱ्या दर्ज्याचो कला महोत्सव ह्या वाठारांत आयोजीत करतले, अशी म्हायती आमदार जीत आरोलकार हांणी दिली.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
