गोंयंगणे मयें तळयेचें दुरुस्तीचें काम सुरू

भांगरभूंय | प्रतिनिधी

भांगरभूंय । प्रतिनिधी
दिवचलः मयें गोंयंगण हांगच्या तळयेची दुरुस्ती करपाच्या कामाची सुरवात मयेंचो आमदार प्रमेंद्र शेट हांणी बिरेस्तारा केली. सुमार 50 लाख रुपये खर्च करून राज्याच्या उदकास्रोत खात्या वरवीं हें काम हातांत घेतलां. पयलीं हे तळयेचें उदक शेतां खातीर करताले. पूण जाय त्या प्रमाणांत उदकाचो साठो तातूंत जायनाशिल्ल्यान शेंतात उदक मेळनाशिल्लें. तळयेची दुरुस्ती करची अशी मागणी शेतकार फाटल्या कांय वर्सां सावन करताले.
दुरुस्ती कामाक सुरवात करतना मयेंचो सरपंच दिलीप शेट, नार्वेचो सरपंच संदेश पार्सेकार,  तशेंच सखाराम पेडणेकार, रोहिदास घाडी, रोहिदास मायणकार, भानुदास साळगांवकार हे शेतकार, मयें भाजपा मंडळ अध्यक्ष दयानंद कारबोटकार, विश्वास चोडणकार हाजीर आशिल्ले. उदकास्रोत मंत्री सुभाष शिरोडकार हांणी केल्ल्या सहकार्याक लागून तळयेची दुरुस्तीचें काम सुरू जाता अशें प्रेमेंद्र शेट हाणे ह्या वेळार सांगले. बंधाऱ्यांतल्या उदक गळटी जाता तशेंच गेट आनी पाट मोडल्ल्यान शेताक उदका पुरवण जायना. तळयेची दुरुस्ती करपाची मागणी फाटल्या चाळीस वर्सां साकून जाताली. तळयेंतलो चिखोल काडटले आनी नवे पाट बांदतले अशें तांणी सांगलें.
मयें गांवांतल्या खणीक लागून तळयेची अवतिकाय जाल्या. उदका स्रोत खणीच्या खंदकांत लागून ना जाल्यात आनी गोंयंगणे तळी सुकल्या हाचे आड शेतकार तशेंच मयेचो आदलो सरपंच सखाराम पेडणेकार आनी आदलो पंच काशिनाथ मयेकार हांणी सांगून पंचायत ग्रामसभेंत ताचे आड आवाज उठयल्लो. तळयेची दुरुस्ती जातगीर उदक मेळटलें आनी शेतकार परत नेटान कामाक लागतले अशें रोहिदास मायणकार आनी भानुदाक साळगांवकार हांणी सांगलें.