भांगरभूंय | प्रतिनिधी
भांगरभूंय । प्रतिनिधी
म्हापशेंः कुमया- मरड, गिरी हांगच्या राष्ट्रोळी देवस्थानाची सगळीं कागदपत्रां सद्याचे समिती कडेन दिवपााचो तशेंच आपापसांतले मतभेद समजिकायेन सुटावे करपाचो आदेश बार्देशाचो मामलेदार आनी देवस्थान नियंत्रकान दोनूय पक्षकारांक दिला. फाटल्या कांय म्हयन्यां सावन सध्याची समिती आनी गडेकार-उसकयकार घराब्यां मदीं राष्ट्रोळी देवस्थानाच्या हक्का वयल्यान वाद सुरू आसा. दोन वर्सां आदीं 22 वर्सां सावन आशिल्ली समिती बदलून नवी समिती वेचल्या.
हे समिती कडेन देवस्थानाची कागदपत्रां, साहित्य आनी हिशेब दिनास्तना गडेकार आनी उसकयकार घराबे देवस्थानाच्या नांवान ट्रस्ट स्थापन केला आनी नवे समितीक न्यायालया वतीन नोटीस धाडिल्ली आनी स्टेजीच्या बांदकामाक आडमेळे हाडटात म्हणून म्हापशे पुलिसांत कागाळ केल्ली. ट्रस्ट बोगस आशिल्ल्याचो दावो करून नवे समितीन म्हापशें पुलीस तशेंच बार्देश मामलेदारा कडेन कागाळ केल्ली. आमका दोनूय घराब्यांनी न्यालालय तशेंच पुलीस स्टेशनांची सोंपणा चडपाक लायलीं असो आरोप ग्रामस्थांनी पत्रकारां कडेन उलयतना सांगलें.
बिरेस्तार दनपारां म्हापशें पुलीस स्टेशनांतलो निरीक्षक सुनील पाटील हाणे समिती आनी ग्रामस्थांची बाजू आयकली. हें प्रकरण देवस्थाना कडेन संबंदीत आशिल्ल्यान तें उपजिल्होधिकाऱ्या कडेन वर्ग करपाचें आस्वासन दिलें. साजें मामलेदार प्रवीण गांवस हाणे दोनूय पक्षकारांची जोड बसका घेतली. देवस्थाना कडेन संबंद आशिल्ली कागदपत्रां आनी दस्तावेज नवे समितीचे सुवादीन करपाचो आदेश तांणी ट्रस्टाच्या जाळवणदारांक दिलो. ते खातीर पांच दिसांची मुजत दिल्या. ते उपरांत समितीन ट्रस्टा संबदीचे जे अधिकार आसात ते तांका दिवचें आनी समजिकायेन वाद सुटावो करपाक मामलेदारान सांगला
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
