भांगरभूंय | प्रतिनिधी
250 कलमांचो लासून गोबर; 3 लाखांचें लुकसाण
भांगरभूंय । प्रतिनिधी
वाळपयः म्हावूस सत्तरी वाठारांत 2 फेब्रुवारीक दनपारां राणे कुटुंबाचे काजू बागायतीक उजो लागलो. ह्या उज्याक लागून सुमार 3 लाखांचें लुकसाण जालें.
वीज सरयांनी बिघाड जाल्ल्यान उजो लागिल्ल्याचो अदमास आसा. राणे कुटुंबांतले नामदेव राणे हांणी हे विशीं नाराजी उक्तायल्या. वीज केबलांची दुरुस्ती करची अशी मागणी फाटल्या तीन वर्सां सावन करतात, अशें नामदेव राणे हांणी सांगलें.
मेळिल्ले म्हायती प्रमाण वाळपय शारांतल्यान म्हावूस वतना रस्त्याचे कुशीक राणे कुटुंबाची व्हड काजू बागायत आसा. सुमार 300 परस अदीक झाडां तातूंत आसात. 2 फेब्रुवारीक अचकीत तिका उजो लागलो. ही म्हायती मेळटाच वाळपय उजो पालोवपी दळाच्या जवानांनी येवन तो सुमार दोन वरांच्या यत्नां उपरांत पालयलो.
बागायतींतल्यान व्हेल्ली वीज सरयो खूब पोरण्यो जाल्यात. ताका लागून दोन वर्सां सावन अश्यो घडणुको अदींमदीं घडटात. ताका लागून ह्यो वीज सरयो ह्या वाठारांतल्यान काडच्यो, अशी मागणी थळाव्या वीज कार्यालया कडेन केल्ली. तांणी ते कडेन आडनदर केल्ल्यान ही घडणूक घडली, अशें नामदेव राणे हांणी सांगलें. उजो पालोवपी दळाच्या जवानांनी सुमार 80 लाखांची मालमत्ता वाटोवपाक येस मेळयलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
