भांगरभूंय | प्रतिनिधी
प्रेमेंद्र शेटः 1659 दावे ताकतिकेन निकालांत काडटले
भांगरभूंय । प्रतिनिधी
दिवचलः मयें मालमत्ता प्रस्न सोडोवचे खातीर भाजपा सरकारान सगळी ती दुरुस्ती केल्या. आतां जलद गतीन दावे निकालांत काडचे खातीर पणजी बदला दिवचले सेगीत सुनावणी घेवपाक मान्यताय मेळ्ळ्या. 1650 दावे ताकतिकेन निकालांत काडटले. शेती आनी हेर जमनींचे प्रस्न लेगीत निकालांत काडटले. मुख्यमंत्री डॉ. प्रमोद सावंत हांणी विशेश आदार केल्ले खातीर मयेंकारांक व्हड थाकाय मेळटले अशी म्हायती मयेंचे आमदार प्रेमेंद्र शेट हांणी पत्रकार परिशदेंत दिली. ह्या वेळार तांचे वांगडा कायदो सल्लागार नारायण नार्वेकार, भाजपाचे म्हणयारे प्रेमानंद म्हांबरे, भाजपा मंडळ अध्यक्ष दयानंद कारबोटकार, जिल्हो पंचायत वांगडी शंकर चोडणकार, सचीव विश्वास चोडणकार, सरपंच दिलीप शेट हाजीर आशिल्ले.
हे आदीं 450 लोकांक सनदी दिल्यात. ते उपरांत मालकी हक्का खातीर एकूच पुरावो सादर करपाची अटक सरकारान मंजूर केल्या. ताका लागून आतां हे सगळे दावे जलद गतीन निकालात काडपाक मेळचे हे खातीर दिवचल उपजिल्होधिकारी कार्यालयांत सेगीत सुनावणी जातली. दर दिसा दोन वरां कामकाज करून प्रक्रिया 31 मार्च मेरेन पुराय करतले, अशेंय शेट हांणी सांगलें.
मजगतीं, मयें मतदारसंघाचो आमदार ह्या नात्यान 10 म्हयन्यांत खूबश्यो येवजण्यो चालीक लायल्यो. तातूंत भुंयारी वीज केबल, उदक, रस्ते, वीज, शेती प्रस्न, बांद, रोरो फेरी खातीर प्रस्ताव, तळयांचें पुनरुज्जीवन, मयें नार्वें ह्या वाठारांत पर्यटन सुविधांक चालना, सलीम अली अभयारण्य सुदारणा, नव्या पुला खातीर प्रस्तावांक चालना, खेळां मैदानां विकसीत करप, अश्यो साबार येवजण्यो चालीक लायल्यात, अशें शेट हांणी सांगलें.
वन वाठारांत नियोजीत सुवातेंत व्हड स्डेडियम बांदपाचो प्रस्ताव चालीक लावचे खातीर फाटपुरवण सुरू आसा. मयें मतदारसंघ सगळ्या सुविधांनी युक्त करपाचो आपलो संकल्प आशिल्ल्याचें शेट हांणी सांगलें.
चोडण- साल्वादोर दी मुंद पुलाच्या कामाक वर्सभरांत चालना मेळटली. जे जमीन धनी आसात तांकां भरपाय म्हूण 13.50 कोटी मंजूर जाल्यात. ही प्रक्रिया पुराय करून ह्याच वर्सा काम सुरू करपाचो निश्चेव केला. आमदार मतदारसंघांत बरो वावर करता, अशें प्रेमानंद म्हांबरे हांणी सांगलें. मयें वाठारांत सरकारी जमनीचो वापर व्हड प्रकल्प उबारपा खातीर करतले. मसुंडी बांदपाच्या प्रस्तावाकूय गती दितले, अशें म्हांबरे हांणी सागलें.
म्हादय़ बाबतींत सरकार ठाम
म्हादय बाबतींत राज्य सरकार न्यायालयीन लडाय निश्चीत जिखतलें. आमची बाजू घटमूट आसा. ह्या प्रकरणांत मुख्यमंत्र्यांनी विशेश लक्ष घातलां. म्हादय आमची जीवनदायिनी आशिल्ल्यान तिचें सरंक्षण ही आमची पयली लागणूक, अशें आमदार प्रेमेंद्र शेट हांणी सांगलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
