भांगरभूंय | प्रतिनिधी
राजेश फळदेसाय गोंय पुनर्वसन मंडळाचे अध्यक्ष
पणजी : काँग्रेसींतल्यान भाजपांत प्रवेश केल्ल्या आनीक दोन आमदारांक लावाचीं पदां मेळ्ळ्यांत. मुरगांवचे आमदार संकल्प आमोणकार हांची बाल भवनाच्या अध्यक्षपदार नेमणूक जाल्या. ते भायर कुमारजुंवेंचे आमदार राजेश फळदेसाय हांची गोंय पुनर्वसन मंडळाच्या अध्यक्षपदार नेमणूक जाल्या. बुधवारा दोगांयच्या नेमणुकेचो आदेश जारी जाला.
काँग्रेसीच्या आठ आमदारांनी सप्टेंबरांत वेगळो गट स्थापन करून भाजपांत प्रवेश केल्लो. हाचे मदल्या कोणाकूच मंत्रीपद मेळूंक ना. फाटल्या म्हयन्यांत डिलायला लोबो आनी केदार नायक हांकां पदां दिल्लीं. केदार नायक हांकां जीएसआयडीसीचे उपाध्यक्षपद मेळ्ळां. जाल्यार डिलायला लोबो हांकां मनरिजवण संस्थेचें उपाध्यक्षपद मेळ्ळां.
दिगंबर कामत, मायकल लोबो, अालेक्स सिक्वेरा हांकां कसलींच पदां मेळूंक नात. चार आमदारांक पदां मेळिल्ल्यान हेर आमदारांक कसलें ना कसलें पद मेळपाची आस्त आसा.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
