भांगरभूंय | प्रतिनिधी
पर्यटन मंत्री, टीटीएजीचो अर्थसंकल्पाक येवकार
पणजी : कोरोना वेळार पर्यटन उद्देग ठप्प जाल्लो. देशांतल्या पर्यटन उद्देगाक उर्बा दिवपी येवजण्यो अर्थसंकल्पांत आसात अशें पर्यटन मंत्री रोहन खंवटे हांणी म्हणलां. मुळाव्या सुविधांची निर्मिती तशेंच कनेक्टिव्हिटीचेर भर दिवपी हो अर्थसंकल्प आसा. हाचो गोंयचें पर्यटन तशेंच पर्यटन उद्देगाक लाव जातलो अशें ट्रॅव्हल अॅण्ड टुरिजम असोसिएशन ऑफ गोवाचे अध्यक्ष निलेश शाह हांणी म्हणलां.
संतुलीत पर्यटन वाडीक उर्बा: रोहन खंवटे
हस्त कारागिरी तशेंच कला कुसरीच्या वस्तूंक बाजारपेठ तशेंच निर्मिती उर्बा दिवपाची तजवीज आसा. गोंयांत गोंय हाट प्रकल्प जावपाचो आसा. ह्य प्रकल्पाक मजत जातली. प्रसाद तशेंच स्वदेश दर्शन येवजणेचो लाव गोंयाक जातलो. कोडींग, रोबोटिक्स, द्रोण शिक्षण हाचेर भर आसा. हाचो म्हायती तंत्रज्ञान वाठाराक लाव जातलो. मुळाव्यो सुविधा आनी कनेक्टिव्हिटी पर्यटन वाडपा खातीर गरजेची आसा. ह्या दोनूय गजालींचो अर्थसंकल्पांत भर आसा. राज्यांतलें पर्यटन वाडपाक हाचो लाव जातलो, अशें पर्यटन मंत्री रोहन खंवटे हांणी सांगलें.
आयकर स्लॅब वाडोपाचो लाव : निलेश शाह
आयकर लागू जावपी येणावळीची मर्यादा वाडयल्या. हाका लागून लोकां कडेन पयशे उरतले. हाचो पर्यटनाक लाव जातलो. मुळाव्या सुविधांच्या निर्मितीचेर भर आसा. विमान सेवा, रेल्वे सेवा सुरळीत जातली. पर्यटन थळांचेर सुविधा उबारपा खातीर निधी उपलब्ध जातलो. हाचो लाव राज्यांतल्या पर्यटन थळांक जातलो. कोरोना वेळार पर्यटन उद्देग ठप्प आशिल्लो. स्वदेश दर्शन, प्रसाद सारख्या येवजण्यांचेर भरीव तजवीज केल्या. गोंयांत कलाकुसरीच्यो वस्तू तयार जावपाचे प्रमाण वाडटा. ह्या वस्तुंच्या मार्केटिंगांक उर्बा दिवपाची तजवीज आसा. गोंया खातीर स्वतंत्र येवजण नासली तरी गोंयच्या पर्यटनाक उबारी मेळटली अशें टीटीएजीचे अध्यक्ष निलेश शाह हांणी सांगलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
