भांगरभूंय | प्रतिनिधी
सरकारान हस्तक्षेप करून रक्कम परतून दिवपाची ठेवीदारांची मागणी
भांगरभूंय । प्रतिनिधी
म्हापशें: तीन वर्सां सावन ठेवीची रक्कम परतून मेळनाशिल्ल्यान कांय ठेवीदारांनी अष्टगंधा अर्बन सहकारी को. ऑपरेटीव्ह सोसायटीच्या अस्नोडेंच्या मुख्य फाट्यांत वेवस्थापकाक घेराव घातलो आनी पयशे परतून दिवपाची मागणी केली. हे विशीं ठेवीदारांनी सहकार निबंधका कडेन कागाळ केल्या. सरकारान हातूंत हस्तक्षेप करून आपली रक्कम परतून दिवची, अशी विनवणी तांणी ह्या वेळार केली.
हे पतसंस्थेंत 200 परस चड ठेवीदार आसात. तांणी सुमार 4 ते 5 कोटी रुपया संस्थेच्या खात्यांत जमा केल्यात. फाटलीं तीन वर्सां घामा कश्टाची ही रक्कम परतून मेळनाशिल्ल्यान ठेवीदार निर्शेल्यात. ते भायर संस्थेन आपल्या हेर फाट्यांक कुलप मारलां. हालींच हे संस्थेच्या खोर्जुवेच्या फाट्यांत लोकांनी जमा केल्ली वीज बिलाची रक्कम लेगीत बुडयिल्ल्याचें उजवाडाक आयिल्लें. ताका लागून ह्या वीज गिरायकांनी वीज खात्या कडेन आपलें गाराणें मांडलां.
संस्थेचे अध्यक्ष भायर पडिल्ल्या सावन उपाध्यक्षान संचालक मंडळाची बसका घेवंक ना. तांणी दिल्ले चॅक बावन्स जातात आनी पयशे मेळटले, अशें फक्त आस्वासन वेवस्थापका कडल्यान मेळटा. जांणी व्हड रीण घेतिल्लें, त्या चडशा रिणकारांक तशेंच तांच्या हमीदारांक मरण आयलां. जाल्यार कांय प्रकरणांत न्यायप्रविश्ठ आसात, अशें सांगतात असो दावो कांय ठेवीदारांनी केला. संस्थेच्या मालकीची मालमत्ता ना. ताका लागून सरकारान हे संस्थेचें संचालक मंडळ तशेंच वेवस्थापकाच्या घरांचेर धाड घालून मालमत्ता जप्त करची आनी आमचे पयशे परतून दिवचे, अशी मागणी पंच मिनेश नायक, डॉ. आर. बी. गोन्साल्वीस, राजेश कामत, दीपाली परब गांवकार आनी हेर ठेवीदारांनी केल्या.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
