भांगरभूंय | प्रतिनिधी
भांगरभूंय । खबरां मेज
साखळीः सत्तरी तालुक्यांतल्या अडवय गांवांतल्या सुमार 35 तरणाट्यांनी एकठांय येवून सकाळीं 8 तें दनपारां 2.30 मजगतीं पुराय गांव नितळ करपाचें देख देणे काम केलें. हे मोहिमेंत तांणी टीटे घाट, रेडी घाट आनी उपरांत पुराय गांव नितळ करपाचें काम केलें.
म्हत्वाचें म्हणल्यार हे नितळसाणेच्या कामांत ल्हान भुरगीं लेगीत वांटेकार जाल्लीं. गांवांत सगल्यात चड प्लास्टिक कोयर मेळ्ळो. तातूंत प्लास्टिक बाटल्यो आनी हेर तरेचो कोयर आशिल्लो. एकठांय केल्लो कोयर विलो लावपा खातीर भिरोंडें पंचायतीचे सुवादीन केलो. आपलो गांव नितळ दवोरपाचें काम दरेकान करपाक जाय. नितळसाणे खातीर आमी महात्मा गांधीजींक मातनात. ताचें पुण्यतिथी निमतान आमी गांधीजींनी सुरवात केल्ल्या नितळसाण मोहीम आमच्या गांवात चालीक लायली अशें रविराज देसाय हाणे सांगलें.
प्रधानमंत्री नरेंद्र मोदी हांणी नितळ भारत ही संकल्पना चालीक लायल्या. तरणाट्यांनी ती फुडें व्हरपा खातीर हातभार लावपाक जाय. गोंय प्लास्टिक मुक्त करपाचो गोंय सरकारान निश्चेव केला. तातूंत दरेका नागरिकान वांटेकार जावपाक जाय. न्हंयांनी प्लास्टिक कोयर उडोवपाक जायना. प्लास्टिक कोयराक लागून उदक आनी जमीन प्रदूशीत जाता हाचो दरेकल्यान विचार करपाक जाय अशें नितळसाण मोहिमेंत वांटेकार जाल्ल्या तरणाट्यांनी सांगलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
