भांगरभूंय | प्रतिनिधी
उपनगराध्यक्ष चंद्रशेखर बेनकार हांचो राजिनामो; विराज फडकेची निवड जावपाची शक्यताय
म्हापशें: नगराध्यक्षपदार अपेक्षीत प्रमाण प्रिया मिशाळ हांची बिनविरोध निवड जाली. निर्वाचन अधिकारी उपजिल्होधिकारी गुरुदास देसाय हांणी नगराध्यक्षपदार प्रिया मिशाळ हांची नेमणूक जाल्ल्याची घोशणा केली.
मंगळारा सकाळीं म्हापशें पालिका सभाघरांत नगराध्यक्षपदा खातीर वेंचणूक जाली. नवनिर्वाचीत नगराध्यक्षा प्रिया मिशाळ हांचे कडल्यान वट्ट तीन उमेदवारी अर्ज दाखल जाल्ले. हे सगले अर्ज ग्राह्य धरून निर्वाचन अधिकाऱ्यांनी वेंचणूक प्रक्रिया पार पाडली आनी उपरांत तांची नगराध्यक्षपदार बिनविरोध निवड जाल्ल्याची घोशणा केली.
उपरांत सगल्या नगरसेवकांनी तशेंच पालिकेंतल्या कर्मचाऱ्यांनी नवनिर्वाचीत नगराध्यक्ष मिशाळ हांकां फुलांहार आनी फुलांतुरे भेटोवन परबीं भेटयली. पालिका मंडळाचे खाशेले बसकेंत नगरसेविका किशोरी आमोणकार सोडून सगले नगरसेवक, नगरसेविका आनी पालिका मुख्याधिकारी अमितेश शिरवयकार हाजीर आशिल्ले.
नव्यो नगराध्यक्षा प्रिया मिशाळ हांणी म्हणलें, सगल्या वांगडी नगरसेवकांनी म्हजेर विस्वास दाखयलो. एकमतान म्हजी निवड केल्ले खातीर हांव सगल्यांचें उपकार मानतां. सगल्यांक विस्वासांत घेवन कामां करतलें आनी म्हापशें शारांतल्या मुळाव्या सुविधांचेर चड भर दितलें. आमदार आनी भारतीय जनता पक्षान म्हज्या खांदार दिल्ली ही जापसालदारकी योग्य तरेन पार पाडपाचो हांव यत्न करतलें.
म्हापशें नगरपालिकेचे उपनगराध्यक्ष चंद्रशेखर बेनकार हांणी आपल्या पदाचा राजिनामो दिलो. नव्या नगराध्यक्षाची निवड जावचे आदले दिसा म्हणल्यार सोमाराच बेनकार हांणी पालिका प्रशासकी संचालका कडेन आपलें राजिनामो पत्र सादर केलें. सत्ताधारी गटांतल्या अलिखीत कबलाती प्रमाण नगराध्यक्ष आनी उपनगराध्यक्षपदाचो कार्यकाळ कांय म्हयन्यां पयलींच सोंपिल्लो. ते प्रमाण दोनूय पदांचो एकठांय राजिनामो दिवपाची सुचोवणी ह्या गटाच्या फुडाऱ्यांनी केल्ली. 11 जानेवारीक आदल्या नगराध्यक्षांनी आपल्या पदाचो राजिनामो दिल्लो. आतां उपनगराध्यक्षपदार नगरसेवक विराज फडके हांची निवड जावपाची शक्यताय आसा. हालींच जाल्ले सत्ताधारी गटाचे बसकेंत नवे उपनगराध्यक्ष म्हूण तांच्या नांवाचेर म्होर मारिल्ली.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
