भांगरभूंय | प्रतिनिधी
मुख्यमंत्रीः व्हिजन फॉर ऑल उपक्रमांत गोंय पयलें
भांगरभूंय । प्रतिनिधी
दिवचलः फेंब्रुवारींत गोंयांतल्या यत्ता पयली ते धावी मेरेनच्या सुमार दोन लाख विद्यार्थ्यांच्या दोळ्यांची तपासणी करतले. गोंयांतल्या एकाय भुरग्याक नदरेचो दोश आसचो न्हय हे खातीर विशेश जतनाय घेतले. प्रधानमंत्री नरेंद्र मोदी हांच्या व्हिजन फॉर ऑल उपक्रमा खाला गोंयांतल्या सुमार एक हजार शिक्षकांक भुरग्यांच्या दोळ्यांची मुळावी तपासणी करपाचें प्रशिक्षण दितात. व्हिजन फॉर ऑल उपक्रमांत गोंय देशांतलें पयलें राज्य थारतलें, असो विस्वास मुख्यमंत्री डॉ. प्रमोद सावंत हांणी उक्तायलो.
सांखळेच्या रवींद्र भवनांत गोंय भलायकी खातें, प्रसाद नेत्रालय, गोंय शिक्षण खातें हांच्या जोडपालवान उत्तर गोंयांतल्या सुमार 700 शिक्षकां खातीर दोळे तपासणी, मुळावे उपचार प्रशिक्षण शिबीर आयोजीत केल्लें. ह्या वेळार मुख्यमंत्री डॉ. सावंत उलयताले. ह्या वेळार तांचे वांगडा माचयेर डॉ. कृष्णप्रसाद कुंडलू, के. व्ही. महेश, डॉ. राहुल आली, शैलेश झिंगडे, डॉ. संजय बांदेकार, डॉ. आश्वीन डिसोझा, मनोज सावयकार हाजीर आशिल्ले.
गोंयांतल्या शिक्षकांनी भुरग्यांचे दिश्टी बाबतींत योग्य पद्दतीन नदर दवरून तांच्या दोळ्यांची, दिश्टीची जनताय घेवप, तांकां कसलेय त्रास जाता जाल्यार ते तपासून उपचार करप आनी ह्या माध्यमांतल्यान भुरग्यांक दिश्टी दोशा पासून राखप हो ह्या उपक्रमाचो मुखेल हेतू. भुरग्यांची नदर बरी उरली जाल्यार तांकां उड्डाण घेवप शक्य आसा. ते नदरेन तज्ञ दोतोर शिक्षकांक जें मुळावें गिन्यान दितले, तें प्रामाणीकपणान घेवन भुरग्यांची दोळ्यांची जतनाय घेवप गरजेचें आसा. ही जापसालदारकी शिक्षकांनी प्रामाणीकपणान पुराय करची, असो उलो मुख्यमंत्री डॉ. प्रमोद सावंत हांणी मारलो.
आत्मनिर्भर भारत स्वयंपूर्ण गोंय खाला खूबश्यो कार्यावळी चालीक लायल्यो. व्हिजन फॉर ऑल खाला 50 हजार भुरग्यांचे दोळे तपासले. हे मुखार एकूय विद्यार्थ्याक दिश्टी दोश आसचो न्हय हे खातीर सगळ्या विद्यार्थ्यांची दोळे तपासणी, ऑपरेशन, वक्लां दितले. ते खातीर शिक्षकांक विशेश मार्गदर्शन दिवन तांकांच दोळ्यांचे दोतोर जावपाची संद मेळटली, अशें मुख्यमंत्र्यान सांगलें. मार्च मेरेन सगळ्या भुरग्यांचे दोळे तपासतले. तशेंच दर जूनांत नव्यान येवपी भुरग्यांची शाळेंत तपासणी करपाचे आदेश, तांणी दिले.
गोंयांत आनी देशांत दिश्टीहिनांची संख्या वाडत आसात. ते खातीर मुळाव्या पांवड्याचेर भुरग्यांच्या दोळयांची तपासणी जावप खूब गरजेची. तेच नदरेन हो उपक्रम हातांत घेतला, अशें मुख्यमंत्री डॉ. सावंत हांणी सांगलें. डॉ. कृष्णप्रसाद हांणी शिक्षकां कडेन संवाद सादलो. भुरग्यांच्या दोळ्यांची जतनाय कशी घेवची हे विशीं तांणी मार्गदर्शन केलें. उत्तर आनी दक्षीण गोंयांत प्रशिक्षण पुराय जाताच मार्च मेरेन सगळी प्रक्रिया पुराय करतले, अशें तांणी सांगलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
