भांगरभूंय | प्रतिनिधी
पंचायतीची कारवाय; सीआरझॅड नेम मोडिल्लो
भांगरभूंय । प्रतिनिधी
म्हापशें: कळंगूट दर्यादेगेर सीआरझॅडचे नेम मोडून बांदिल्लें एका माळ्याचें बांदकाम पंचायतीन अतिक्रमण हटाव पंगडाच्या आदारान मातये भरवण केलें.
भरती रेशेचो नेम मोडून तें बांदकाम अरोरा नांवाच्या मनशान बांदिल्लें. कळंगूट दर्यादेगे वयल्या सोझा लोबो ह्या रॅस्टोरंण्टा लागसार सर्वे क्र. 176/16 ब सुवातेंत 134 चौ. मि. जमनीर तें बांदकाम उबारिल्लें. ते खातीर लागपी पंचायत, उत्तर गोंय नियोजन उदरगत प्राधिकरण, गोंय दर्यादेग वेवस्थापन प्राधिकरण आनी संबंदीत परवाने बांदकाम करप्यान घेवंक नाशिल्ले.
काँक्रीट आनी लोखणाच्या आदारान पक्के बांदिल्ल्या ह्या बेकायदो बांदकामा आड पंचायतीन अतिक्रमण हटाव नोटीस जारी केल्ली. ते नोटिशेक संबंदितान पंचायत संचालनालया कडेन याचिका दाखल केल्ली, पूण संचालनालयान कारवायेक स्थगिती दिवंक ना. ताका लागून सोमारा सकाळीं पंचायतीन अतिक्रमण हटाव पंगडाच्या आदारान तें बांदकाम जेसीबीचे मजतीन मातये भरवण केलें, अशी म्हायती पंचायत सचीव अर्जुन वेळीप हांणी दिली.
ह्या वेळार कळंगूट पुलीस थंय तैनात आशिल्ले.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
