भांगरभूंय | प्रतिनिधी
भांगरभूंय । प्रतिनिधी
शिवोलीः दत्तोपंत ठेंगडी केंद्रीय बायल मजूर शिक्षण संस्थे वतीन शिवोली मतदारसंघांतल्या बायलां खातीर जाग्रुती मेळावो जालो. शिवोलेची आमदार डिलायला लोबो हिणे दिवली पेटोवन ताचें उक्तावण केलें. ह्या वेळार ठेंगडी शिक्षण संस्थेची अधिकारी अरूणा विष्णू वाघ, शिवोलेची सरपंच शर्मिला वेर्णेकार, सडयेची सरपंच दीपा पेडणेकार हाजीर आशिल्ली.
भारतांत डॉ बाबासाहेब आंबेडकर हांणी तयार केल्लें संविधान लागू जावंक नाशिल्लें जाल्यार बायलांक जीण जगपाक कुस्तार जाताशिल्लें. महात्मा ज्योतिबा फुले, सावित्रीबाई फुले, राजा राम मनोहर रॉय हे बायलां खातीर दैवतां सारके आसात. भारतीय संविधानाक लागून जायत्यो बायलो आतां व्हडले सुवातेर पावल्यात. डिलायला लोबो हे तांचें एक उदाहरण आसा अशें अरूणा वाघ हिणे ह्या वेळार सांगलें.
मार्ना-शिवोलेच्या पंचायत सभाघरांत जाल्ले हे मेळाव्याक शिवोलेची सरपंच शर्मिला वेर्णेकार, उप-सरपंच विलियम फर्नांडीस, पंच वांगडी अमीत मोरजकार, फेर्मिना फर्नांडीस, सडयेंची सरपंच दीपा पेडणेकार, हणजुणची उपसरपंच एग्नेस कारवाल्हो, शीतल नायक, स्मिता खोर्जुवेकार, व्हिलेज ऑर्गनायझेशनची रेषा हरमलकार, गौरी गोवेकार, सुनंदा वेर्णेकर हाजीर आशिल्ली. देशाच्या गांवगिऱ्या वाठारांत बायलो रोजगारा विणे उरच्यो न्हय हे कडेन दत्तोपंत ठेंगडी केंद्रीय बायल मजूर शिक्षण यत्न करता अशी म्हायती वाघ हिणे दिली.
टक्केवारींत दादल्यांच्या बोरोबोरीन आशिल्ल्या बायलांक जाय तितल्यो संदी मेळनात. बायलांनी सरकारी येवजण्यांचे लाब घेवपा खातीर फुडे येवपाक जाय, आपल्या अधिकाऱांची म्हायती मेळोवपाक जाय अशें डिलायला लोबोन सांगलें. ठेंगडी कार्यालया कडेन संबंद आशिल्ल्या बायलांचो ह्या वेळार लोबो हिचे हस्तुकीं भोवमान केलो. सुरवेक शर्मिला वेर्णेकारान उपकार मानले. सूत्रसंचालन संतोष गोवेकारान केलें, निमाणे सामूहिक हळदीकुकूम कार्यावळीन मेळाव्याचो समारोप जालो. मेळाव्याक सुमार दोनशे बायलो हाजीर आशिल्ल्यो.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
