भांगरभूंय | प्रतिनिधी
भांगरभूंय । प्रतिनिधी
वाळपयः सत्तरी तालुक्यांतल्या नाणूस किल्ल्यार आशिल्ल्या क्रांतीवीर दिपाजी राणे हांच्या पुतळ्याक दर वर्सा 26 जानेवारीक सरकारा वतीन मानवंदना दिवपाची घोशणा मुख्यमंत्री डॉ प्रमोद सावंत हांणी केल्या. सत्तरी इतिहास संवर्धन समिती वतीन फाटल्या 14 वर्सां सावन ही मागणी करताली. नाणूस किल्ल्याचें संवर्धन आनी दिपाजी राणे हांचो इतिहास सामकार येवचो हे खातीर समितीन यत्न चलयल्ले. मुख्यमंत्र्यांन तांची मागणी मानून घेतल्या.
नाणूस किल्ल्यार जाल्ले कार्यावळीक समितीचे सन्मवयक शिवाजी देसाय, दिपाजी राणे हांचो पणतू दिपाजी राणे, पुलीस म्हासंचालक जसपाल सिंग, संजित रॉड्रिक्स, उपजिल्हाधिकारी प्रविण परब, जोड मामलेदार अपुर्वा कर्पे, गटविकास अधिकारी सूर्याजीराव राणे, आदले उपसभापती नरहरी हळदणकार, वाळपयची नगराध्यक्ष शेहजीन शेख, उपनगराध्यक्ष अनिल काटकर, रामदास शिरोडकर, प्रसन्ना गांवस, शराफत खान, इद्रुस शेख, भिरोंडेचो सरपंच उदयसिंग राणे, वासुदेव परब हाजीर आशिल्ले.
नाणूस किल्ल्याचें संवर्धन करपाचें सरकारान थारायलां. पुरातत्व खात्या वतीन हें काम करतले. पयलीं आशिल्लो तसो व्हो किल्लो करतले अशें डॉ सावंत हांणी सांगलें. डॉ सावंत जेन्ना आमदार आशिल्ले तेन्ना तांणी दिपाजी राणेचें नांव वाळपयच्या सरकारी हॉस्पिटलाक दिवचें असो विधासभेंत थाराव मांडल्लो. नाणूस किल्लो चळवळी खातीर तांणी मजत केल्या अशें शिवाजी देसाय हांणे सांगलें. नाणुस किल्ल्याचेर वचपा खातीर तयार केल्ल्या पायवाटे वयल्या चलत सगळे किल्ल्यार आयले. थंयच्यान तांणी म्हादयचें दर्शन घेतले.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
