भांगरभूंय | प्रतिनिधी
खबरां संस्था
मेलबर्नः ग्रीसाच्या स्टेफानोस त्सित्सिपासाक हारोवन सर्बियाच्या नोव्हाक जोकोवीच ऑस्ट्रेलियन ओपनाचो बादशाह थारलो. ऑस्ट्रेलियन ओपनाचें हें ताचें 10वें वस्तादपण. फायनलींत ताणे स्टेफानोसाक 6-3, 7-6, 7-6 अशें हारयलें. जोकोविचाचे टेनीस कारकिर्दींतलें हें 22वें ग्रँडस्लॅम आसा.
वस्तादपणाचे मॅचींत जोकिविचान बरी सुरवात केली आनी पयलो सेट 6-3 आनी दुसरो सेट 7-6 असो जिखलो. दुसरो सेट जिखतगीर जोकोवीच ही मॅच जिखतलो अशें दिसतालें आनी तशेंच जालें. ऑस्ट्रेलियन ओनपाचे फायनलींत पावपी 24 वर्सां पिरायेचो स्टेफानोस हो दुसरो सगल्यांत तरणाटो टेनीस खेळगडो आसा. ते पयलीं जोकोविचान 2011 वर्सा पिरायेचे 23व्या वर्सा फायनलींत प्रवेश केल्लो. जोकोवीच आनी स्टेफानोस हातूंतलो जो कोणूच जिखतलो तो एटीपी रँकिंगांक नंबर एक जावपाचो आशिल्लो. जोकोविचान तो मान मेळयलो.
जोकोवीच 10वे फावट ऑस्ट्रेलियन ओपनाची फायनल खेळ्ळो. हाचे पयलीं ताणे णव फावट ग्रँडस्लॅम सर्तीचे फायनलींत प्रवेश केल्लो आनी दर फावट ताणे जैत मेळयल्लें. जोकोविचान 2008, 2011, 2012, 2013, 2015, 2016, 2019, 2020 आनी 2021 वर्सा वस्तादपण मेळयल्लें. 2022 वर्सा व्हिसाच्या कारणाक लागून तो हे सर्तींत वांटो घेवपाक शकलो ना. राफेल नदालान तेन्ना ऑस्ट्रेलियन ओपनाचें वस्तादपण मेळयल्लें. मात ताचें उट्टें काडत अंदूचे ग्रँडस्लॅम वस्तादपण ताणे मेळयलें.
22वें ग्रँडस्लॅम जिखलें
जोकोवीच 22व्या ग्रँडस्लॅम वस्तादपणा खातीर कोर्टार देंवल्लो. हाचे पयलीं ताणे 9 ऑस्ट्रेलियन ओपन, दोन फ्रेंच ओपन, सात बिम्बल्डन आनी तीन यूएएस ओपमा सायत वट्ट 21 ग्रँडस्लॅम जिखिल्लीं. सगल्यांत चड ग्रँडस्लॅम जिखपा विशीं फकत राफेल नदाल जोकोविचाच्या फुडें आशिल्लो. नदाला कडेन 22 ग्रँडस्लॅम वस्तादपणा आसात. तशेंच रॉजर फेडरर 20 ग्रँडस्लॅमा सयत तिसरे सुवातेर आसा. जोकिविचान नदलाच्या 22 ग्रँडस्लॅमा कडेन आतां बोरोबोरी केल्या.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
