भांगरभूंय | प्रतिनिधी
भांगरभूंय । खबरां मेज
पणजीः केंप्या सरकारी म्हाविद्यालयांत आयतार 29 जानेवारीक जावपी दुसऱ्या गोंय आदिवासी साहित्य संमेलनाचे उक्तावण नामनेचो म्हायतीपट दिग्दर्शक स्टेलनी के हाचें हस्तुकीं सकाळीं 9.30 वरांचेर जातलें. आदिवासी साहित्य संघाच्या अध्यक्ष म्हणून आदिवासी कोंकणी साहित्यीक पांडुरंग काशीनाथ गावडे हांची निवड केल्या.
आदिवासी संशोधन केंद्र, गोंय आदिवासी संघ आनी गोंय सरकाराच्या कला आनी संस्कृती खात्याच्या जोड पालवान जावपी ह्या एका दिसाच्या संमेलनांत मौखीक आदिवासी साहित्याचें म्हत्व आनी फुडार ह्या विशयाचेर भासाभास जातली. संमेलनाची कार्यावळ पत्रिका संमेलनाचे समन्यवयक डॉ मधु घोडकिरेकार, आदिवासी संघाचे अध्यक्ष रामनाथ ग गावडे आनी आदिवासी संशोधन केंद्राचे अध्यक्ष देवीदास गांवकार हांणी जाहीर केल्या.
आदिवासी साहित्य संघा वतीन दिवपाच्या वर्सुकी पुरस्काराची वळेरी जाहीर केल्या. लिखीत साहित्या खातीरचो प्रतिभावंत आदिवासी साहित्यीक पुरस्कार कोंकणी साहित्यीक अविनाश कुंकळखार आनी अँथनी वाझ हांका फावो जाला. मौखीक साहित्या खातीर व्हो पुरस्कार अमेलिया डायस हिका दिला. सर्गेस्त दुर्दादास दत्ता गावडे यादस्तीक गोंय आदिवासी साहित्य प्रतिभा पुरस्कार कोंकणी कवयित्री नीता कुर्टीकार आनी मराठी कवयित्री दीपा देवेंद्र आकारकार हांका मेळ्ळा. क्रियाशील आदिवासी सांस्कृतीक संस्था पुरस्कार हो आदिवासी कला आनी संस्कृती संवर्धना खातीर धा परस चड वर्सा वावुरपी संस्थे खातीर आशिल्लो पुरस्कार अंदू काणकोण आदर्श युवा संघ, केपें आदिवासी संघटन, गोंय जागोर महोत्सव असोसिएशन- फोंडे हांका फावो जाला. संमेलनाचे समारोपाचे कार्यावळीतं ह्या पुरस्कारांचे वितरण जातलें.
संमेलनांत आदले मंत्री आनी आमदार सर्गेस्त डॉ काशीनाथ जल्मी यादस्तीक बाराजण परिचर्चा आयोजीत केल्या. तातूंत गोंयकारांची आदिवासी साहित्यीक परंपरा हाचेर भासाभास जातली. तशेंच दोनशें दुर्मीळ आदिवासी वस्तूंचें प्रदर्शन, वण्टीपत्रक प्रदर्शन आनी वेगवेगळ्यो कार्यावळी आयोजीत केल्यात अशें रामनाथ ग गावडे आनी देवीदास गांवकार आनी डॉ घोडकिरेकार हांणी उजवाडयल्ले पत्रकांत नमूद केलां.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
