भांगरभूंय | प्रतिनिधी
फोंडें: कुंडयचे उद्देगीक वसणुके कडेन वचपी जंक्शना लागसार आयतारा रातीं फोंडें पुलिसांनी धाड घालून अशोक अरूण कुमार (23, रा. पोरणें गोंय, मूळ बिहार) हाका गांजो बाळगिल्ल्या प्रकरणांत अटक केली. पुलिसांनी जप्त केल्ल्या गांज्याचें मोल सुमार देड लाख आसा.
फोंडें पुलिसांनी दिल्ले म्हायती प्रमाण आयतारा रातच्या 9.30 ते 10.45 वरां मजगतीं एक तरणाटो त्या वाठारांत दुबावीत तरेन भोंवता अशी म्हायती पुलिशेक मेळिल्ली.
निरिक्षक विजयकुमार चोडणकार हांच्या मार्गदर्शना खाला उपनिरिक्षक परेश सिनारी आनी नितेश काणकोणकार हांणी हवालदार केदार जल्मी, पुलीस शिपाय अमेय गोसावी, गौरेश भरतु, संदेश पावसकार आनी आदित्य नायक हांणी कारवाय केली. अटक केल्ल्या दुबाविता कडल्यान देड लाखांचो गांजो जप्त केला. फोंडें पुलीस स्टेशनाचे उपअधिक्षक राजेंद्र प्रभुदेसाय हांच्या मार्गदर्शना खाला निरिक्षक विजयकुमार चोडणकार फुडलो तपास करता.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
