भांगरभूंय | प्रतिनिधी
श्रीलंका पंगडा आड 3-0 अशा फरकान जैत जोडल्या उपरांत फकत दोन दिसांनी भारताचो पंगड न्युझिलॅण्डा आड खेळटलो. संवसारीक रॅंकिंगेंत न्युझिलॅण्डाचो पंगड पयले सुवातेर आसा. जर भारत ही माळ 3-0 फरकान जिखता तर तो पयले सुवातेर पावतलो.
भारता खातीर ही मॅच श्रीलंके भशेन सोंपी आसची ना. लोकेश राहुल आनी अक्षर पटेल हांचे गैरहाजेरेंत भारताक आपल्या पंगड संयोजनांत बदल करचो पडटलो. तशेंच आयच्यान सुरू जावपी वन डे मॅची पयलीं कांय निर्णय घेवचे पडटले.
वैयक्तीक कारणांक लागून राहुलान हे माळेंतल्यान फाटीं सरपाचो निर्णय घेतला. जाल्यार ऋषभ पंताच्या मोटार अपघाता उपरांत इशान किशन वन डे आनी टी-20 क्रिकेटींत विकेटकीपराच्या रुपान मुखेल दावेदार म्हूण मुखार आयला.
फाटल्या म्हयन्यांत 126 बॉलांनी वन डे क्रिकेटीच्या इतिहासांत सगल्यांत जलद दोट्टी शेंकडो मारून लेगीत इशानाक श्रीलंके आडचे माळेंत खेळपाक मेळूंक नाशिल्लें. ताचे परस शुभमन गिलाक अदीक पसंती दिली. पंगड वेवस्थापनाचो हो विस्वास गिलान योग्य थारायतना तीन डावांनी एक शेंकडो आनी एक अर्द शेंकडो मारलो.
रवींद्र जडेजाची तंदुरुस्ती आनी अक्षर पटेलाक विसव दिल्ल्यान ऑफ स्पिन अश्टतासांचो खेळगडो वॉशिंग्टन सुंदराक न्युझिलॅण्डा आडच्या दोनूय माळांनी खेळपाची संद मेळुये. बंगालाचो अश्टतासांचो खेळगडो शाहबाज अहमदाक अक्षराचे सुवातेर वेंचला.पूण, टॉम लॅथम, मार्क चॅपमॅन, डॅव्हन कॉन्वे, मायकल ब्रेसवेल आनी मिचेल सॅटनर ह्या दावखुऱ्या बॅट्समनां आड वॉशिंग्टन सुंदर येसस्वी थारुये.
2017त आंतरराष्ट्रीय क्रिकेटींत पदार्पण करपी सुंदराक दुखापतीक लागून किमान दोन संवसारीक सर्तींतल्यान भायर रावचें पडलां. आयपीएल 2022 वरवीं ताणें आपल्या पावर हिटींगाचेर काम केलां. ताचे रचनात्मक शॉट पोरूं न्युझिलॅण्डा आड पळोवपाक मेळिल्ले. फिनिशराची भुमिका वठोवपा खातीर ताणें आपलो घरगुती पंगड तामिळनाडू खातीर रणजी करंड सर्तींत सकयले सुवातेर बॅटींग करपाक सुरवात केल्ली.
श्रीलंके आडचे वन डे माळेंतल्यान भायर रावपी शार्दुल ठाकूराचें न्युझिलॅण्डा आडचे माळे वरवीं पुनरागमन जालां. फास्ट बॉलर अर्शदीप सिंग वन डे पंगडांतल्यान भायर आसा. दीपक चाहर जखमी आसा जाल्यार निवड समितीन भुवनेश्वर कुमारा कडेन आड नदर केल्ल्यान शार्दुल ठाकूराक आनीक संद मेळ्ळ्या. तो चाहरा भशेन स्वींग बॉलर न्हय. पूण, शार्दुल नव्या बॉलान बॉलींग घालपाक शकता. तशेंच बॅटींग लेगीत करता. पोरूं सप्टेंबरांत न्युझिलॅण्ड अ पंगडा आड आठवे सुवातेर बॅटींग करतना 33 बॉलांनी 51 धांवड्यो केल्ल्यो.
अय्यराक माळ चुकतली
मदले फळयेंतलो बॅट्समन श्रेयस अय्यराक दुखापतीक लागून वन डे माळ चुकतली. ताचे सुवातेर युवा बॅट्समन रजत पाटीदाराची निवड केल्या. श्रेयसाक फाटीची दुखापत जाल्या.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
