भांगरभूंय | प्रतिनिधी
भांगरभूंय । प्रतिनिधी
वास्कोः गोंय खादी आनी ग्रामोद्योग मंडळाच्यो ज्यो स्किमी आसात तो लोकां मेरेन पावोवन तांका तांच्या लाब घेवपा खातीर तयार करपाचें काम मंडळाचे पदाधिकारी हातांत घेतले अशें मंडळाचो अध्यक्ष आनी कुठ्ठाळेचो आमदार आन्तोन वास हांणी कुठ्ठाळे आयोजीत केल्ले जाग्रुती कार्यावळींत उलयतना सांगलें. लोकांक आप रोजगार सुरू करपा खातीर मंडळाच्या येवजण्यांची तांच्या वाठारांतल्या लोकांक म्हायती दिवपा खातीर शिबिरां आयोजीत करपाचें आवाहन तांणी राज्यांतल्या पंचायत मंडळान केलां.
जे तरणाटे मंडळाच्या येवजण्यांचो लाब घेवन आप रोजगार सुरू करपाक इत्सूक आसात तांका मंडळा वतीन फावो ती मजत तशेंच प्रशिक्षण दिवपाचें काम मंडळा वतीन हातांत घेतले. कितलींय आस्वासनां दिलीं तरी सध्या सरकारी नोकऱ्यो मेळप सामकें कुस्तार आसा. तरणाट्यांनी तें मतींत घेवन स्वताच्या पांयार उबें रावपाचे यत्न करपाक जाय. खादी ग्रामोद्योग मंडळा कडेन जायत्यो स्किमी आसात. तरणाट्यांक तांची म्हायती ना. तरणाट्यांनी तांचो लाब घेवन रोजगार सुरू करचो अशें वास हाणे मागलां.
1993 वर्सा एक गाडो घालपा खातीर आपणे खादी मंडळा कडल्यान 15 हजारांचे रीण घेतिल्लें. तातूंल्यान आपणे स्वताचो बिझनेस सुरू केलो. आमदार जावन आपूण ताच्या खादी मंडळाचो अध्यक्ष जालां अशें वास हांणी सांगलें. जर गोंयांतल्या खंयच्याय वाठारांतले धा जाण एकठांय जाल्यार तांका तांच्या गांवांत वचून खादी मंडळाच्या स्किमींची तपशिलवार म्हायती दिवपाक आमी तयार आसात अशें तांणी सांगलें.
20 वर्सां आदी आपूण खादी मंडळाचो वांगडी आशिल्लों. आमदार वास हांणी आपल्याक परत वांगडी म्हणून काम करपाची संद दिल्या. सरकारी नोकऱ्यांचेर निंबून रावपा परस खादी मंडळाच्या स्किमीं वरवीं आपलो रोजगार सुरू करपाचो स्वाभिमान तरणाट्यांनी दाखोवपाक जाय अशें मंडळाचो वागंडी रॉकझिनो डिसोझा हांणी सांगलें. कुठ्ठाळे जाग्रुती कार्यावळ घडोवन हाडिल्ले खातीर कुठ्ठाळेची सरपंच सेनिया परेरा हिणे आमदार वास हाचे उपकार मानले.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
