भांगरभूंय | प्रतिनिधी
भांगरभूंय । प्रतिनिधी
पणजीः उत्तर गोंयांतले एके सान चलयचें 2020 वर्सा अपहरण करून तिचेर लिंगीक अत्याचार करपी 18 वर्सां पिरायेच्या तरणाट्याक पणजेचे फास्ट ट्रेक पोक्सो न्यायालयाची न्यायाधीश दुर्गा मडकयकारान 10 वर्सां सश्रम बंदखण आनी 25 हजार रुपयांच्या दंडाच्या ख्यास्त फर्मायली.
ह्या प्रकरणात पिडेस्त चलयेच्या सोरऱ्यांनी केल्ले कागाळे वयल्यान पर्वरी पुलिसांनी तरणाट्याचेर गुन्यांव नोंद केल्लो. 7 सप्टेबर 2020 दिसा ताणे चलयेचें अपहरण करून तिका कोल्हापूर व्हरून तिचेर लिंगीक अत्याचार केल्ले. 9 सप्टेबराक तरणाट्याक पर्वरी पुलिसांनी कोल्हापूर हांगा वचून अटक करून चलयेची सुटका केल्ली. अटक केल्ल्या तरणाट्याक पणजेच्या उत्तर गोंय जिल्हो आनी सत्र न्यायालयान 15 सप्टेंबराक सशर्त जामिनाचेर सोडिल्लो. 5 नोव्हेंबराक सत्र न्यायालयांत आरोप पत्र सादर केल्लें.
सरकारी वकील ए भोबे हांणी युक्तिवाद केलो. न्यायालयान चलयेचें अपहरण केल्ले खातीर 3 वर्सा बंदखण आनी 5 हजार रुपया दंड आनी बलात्कार केल्ले खातीर 10 वर्सा सश्रम बंदखण आनी 10 हजारांचो दंड फर्मायला. न्यायालयान दिल्ली बंदखणीची ख्यास्त एकेच फावट भोगपाची आसा. दंड भरल्यार ती रक्क्म पिडेस्त चलयेक दिवपाचो आदेश न्यायालयान दिला. पर्वरी पुलीस स्टेशनांतलो उपनिरीक्षक प्रतीक भट हाणे ह्या प्रकणाचो तपास केल्लो.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
