भांगरभूंय | प्रतिनिधी
पणजी: कला आनी संस्कृती संचालनालय, पश्चीम विभाग सांस्कृतीक केंद्र, उदयपूर, कला अकादमी, गोंय आनी हेर सरकारी संस्थांच्या जोड पालवान दर्या संगम, कला अकादमी, कांपाल हांगा 30 जानेवारी ते 8 फेब्रुवारी 2023 ह्या काळांत वर्सुकी राष्ट्रीय लोकोत्सव 2023 चें आयोजन करतले.
देशांतल्या विंगड विंगड राज्यांतले सुमार 500 कलाकार ह्या महोत्सवांत वांटो घेवन आपल्या राज्यांतली लोकनाच, लोकसंगीत आनी हेर कला सादर करतले. गोंयांतले 600 परस चड कारागीर हस्तकला वस्तूंचे आनी खावपाच्या जिन्नसांचें प्रदर्शन आनी विक्री करपाचे स्टॉल घालतले.
लोकोत्सवांत आपलो स्टॉल घालपा खातीर कार्ड/परवानो आशिल्लीं हस्तकला, हातमाग, परंपरीक वस्ती आनी हेर उत्पादनां तयार करपी गोंयांतल्या हस्तकला कारागीर आनी बचत गटांकडल्यान विहीत नमुन्यांत अर्ज मागयल्यात.
स्टॉलां खातीर धा दिसांक 6000/- रूपया शुल्क आसा. हस्तकला आनी पॅक्ड फुडाचे स्टॉल शेअरींग तत्वाचेरय आसतले आनी ते प्रमाण शुल्क वाटून घेवपाक मेळटले. शुल्क डेबीट कार्ड वा UPI वरवीं स्टॉल वाटपा वेळार भरचे पडटले. अर्ज 10/- रूपया फारीक करून कला आनी संस्कृती संचालनालय, संस्कृती भवन, पाटो पणजी हांगा 17 ते 18 जानेवारी 2023 मेरेन पयली येवप्यांक पयलीं ह्या तत्त्वाचेर सकाळीं 10 ते सांजेच्या 5 वरां मेरेन उपलब्ध आसतले. पुराय भरिल्ले अर्ज 21 जानेवारी 2023 मेरेन खात्याच्या कार्यालयांत सुपूर्द करपाक जाय. हे अर्ज फकत गोंयच्या हस्तकला कारागीर, पॅक केल्ल्या खावपाच्या जिन्नसांच्या स्टॉलां खातीर आसात. हेर राज्यांतल्या अर्जांचेर विचार जावचो ना. एका विक्रेत्याक फकत एकूच अर्ज दितले.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
