भांगरभूंय | प्रतिनिधी
2018, 2019 आनी 2020 वर्सा म्हादय प्रस्नाचेर ह्या संघाची लोक जागृताय
पणजी: गोंयची जीवनदाता म्हादय वाचोवपा खातीर सगळे राजकीय पक्ष आनी हेर संघटणांनी एकठांय येवन ‘म्हादय वाचयात, गोंय वाचयात’ ह्या बिगर-राजकीय मंचा वतीन आपयल्ल्या आंदोलनाक भारतमाता की जय संघान पुरायेन आनी सक्रीय फाटबळ जाहीर केलां.
भारतमाता की जय संघ आनी ताच्या परिवार संघटणांच्या कार्यकर्त्यांनी सुरवातेक सावनूच ह्या प्रस्नाचें म्हत्व लक्षांत घेवन 2018, 2019 आनी 2020 वर्सा म्हादय प्रस्नाचेर लोक जागृताय करपा खातीर विवीध मोहीम राबयल्यात.
ता. 24 ते 30 जानेवारी 2018 ह्या काळांत ’गोवा सुरक्षा मंच’ वतीन अध्यक्ष आनंद शिरोडकार आनी संयोजक उपाध्यक्ष गोविंद देव हांच्या नेतृत्वा खाला म्हादय संपदा-रक्षा जलयात्रा, म्हादय न्हंयचे दोनूय तडीर सत्तरी, दिवचल, फोंडें आनी तिसवाडी अश्या चार म्हालांतल्या 30 गांवांनी भोंवून आनी पुराय यात्रेच्या वेळार मार्गार मेळिल्ल्या 32 गांवांनी ल्हानश्यो जागरण बसका घेतिल्ल्यो.
25 नोव्हेंबर ते 9 डिसेंबर, 2019 ह्या काळांत आदले आय. ए. एस. अधिकारी आनी समाज कार्यकर्ते अरविंद भाटीकार हांच्या उल्याक प्रतिसाद दिवन म्हादय बचाव ह्या बिगर-राजकीय मंचा खाला सर्वश्री अरविंद भाटीकार, भारतमाता की जय आनी गोंय सुरक्षा मंच वतीन सुभाष वेलिंगकार, अवधूत कामत, आनंद शिरोडकार, आत्माराम गांवकार आनी आप पक्षा वतीन एल्वीस गोमीश, प्रदीप पाडगांवकार, सिद्धार्थ कारापुरकार अश्या खुबश्या फुडार्यांनी मेळून गोंयच्या बाराय म्हालांनी वट्ट 13 जागरण बसका घेतल्यो आनी धरणें धरपाच्यो कार्यावळी केल्यो.
भारत माता की जय संघान, स. अवधुत कामत हांच्या नेतृत्वा खाला, 2 ते 29 फेब्रुवारी, 2020 ह्या काळांत म्हादय माता पूजन अभियान राज्य पांवड्यार सगळ्या बाराय म्हालांतल्या 220 गांवांनी 307 कार्यावळी येसस्वीपणान घेवन वट्ट 20 हजार लोकां मेरेन म्हादयचो विशय पावयलो.
भारतमाता की जय संघाचे कार्यकर्ते आनी संघांत आसपावन घेतिल्ले गोंय सुरक्षा मंचाचे कार्यकर्ते अशी जोड शक्त सध्या आसा. हे कार्यकर्ते गोंय सरकाराच्या नाकर्तेपणाक लागून म्हादय प्रस्नाच्या निर्माण जाल्ले घातकी स्थिती खातीर खूब चिंतेस्त आनी अस्वस्थ आसात.
आतां जनतेकूच पेटून उठचें पडटलें. राजकीय पक्ष आनी बिगर राजकीय संस्था आनी संघटणांनी आपले मतभेद आनी अभिनिवेश कुशीक दवरून जोड लढो उबारचो, ही आयज काळाची गरज आसा.
हें लक्षांत दवरूनच ह्या लढ्याक भारतमाता की जय संघ आपलें फाटबळ जाहीर करता, अशें भारतमाता की जय संघाचे राज्य संघचालक सुभाष भास्कर वेलिंगकार हांणी स्पश्ट केलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
