भांगरभूंय | प्रतिनिधी
70 लाखांची पायपलायन लासली; शेतकारांचेर संकश्ट
भांगरभूंय । प्रतिनिधी
दिवचलः सांखळी मतदारसंघांतल्या सुर्ला पंचायत वाठारांतल्या शेतकारांक उदकाची समस्या सतायता. ताका लागून शेतकारांनी थळावे आमदार तशेंच मुख्यमंत्री डॉ. प्रमोद सावंत हांच्या मार्गदर्शना खाला खण पिटांतल्यान उदक मेळोवन दिवपाचो सरकारान एक नवो प्रकल्प हातांत घेतला. तो पुराय जावपाक आयिल्लो आसतनाच कांय अज्ञातांनी 70 लाख रुपयांचीं पायपां लासून उडोवपाची घडणूक हालींच आमेफाळ कार्ते वाठारांत घडल्या.
अज्ञातांनी लाशिल्ल्या पायपांक लागून संबंदीत खात्याचें लुकसाण जालां. सुर्ला गांवांतल्या शेतकारांनी संघटीत जावन हाचेर चर्चा केली आनी लुकसाणेचो अदमास घेतलो.
ह्या वेळार सरपंच विश्रांती सुर्लकार, उपसरपंच भोला खोडगीणकार, पंच सुभाष फोंडेंकार, बाबले नाटेकार, ओंकार केळकार, सुर्ला सोसायटीचे अध्यक्ष उदय कालेकार, कालीदास बर्वे, हरी मराठे, अशोक खोडगीणकार हाजीर आशिल्ले.
गांवांतले कांय जाण विवीध समाजीक प्रकल्पांक विरोध करपाक जाय म्हूण विरोध करतात. मात शेतकारांक फायद्याचे अशा प्रकल्पांक लुकसाण केलां ताणें आतांच मुखार येवचें, नाजाल्यार उपरांत ताचेर खर कारवाय जातली. हे खातीर पंचायतीन फुडाकार घेतला. जर ह्या प्रकरणांत गांवा भायल्या कोणाचो हात आसा, हें कळत जाल्यार ताचेर आमी खर कारवाय करतले, अशी शिटकावणी शेतकारांनी दिली.
सरकाराच्या संबंदीत अधिकाऱ्यांनी ह्या विशयाचेर खर पावलां उखलपाची गरज आसा, अशें मत सरपंच विश्रांती सुर्लकार हांणी उक्तायलें.
फाटल्या कांय वर्सां सावन थळावे आमदार मुख्यमंत्री डॉ. प्रमोद सावंत हांच्या मार्गदर्शना खाला सुर्लाच्या शेतकारांक बरे दीस पळोवपाक मेळटात. तातूंत सरकारी अधिकाऱ्यांचोय बरो आदार मेळटा. सरकारान कोट्यांनी रुपया खर्च करून 2012 सावन हो प्रकल्प हातांत घेतला. मात तो पुराय जावपाक पावला तेन्ना अशें लुकसाण करून तो बंद उडोवपाचो यत्न करप हें दुर्देवी आसा. सरकारान हाचे आड खर कारवाय करची, अशी मागणी बाबलो नाटेकार हांणी केली.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
