भांगरभूंय | प्रतिनिधी
पणजी: शेणै गोंयबाब सेवा केंद्र, सांवड्डें कुडचडें आयोजीत सर्गेस्त राजेंद्र (राजू) चिमणू नायक यादस्तीक अखील गोंय कोंकणी कविता सादरीकरण सर्त आयतार ता. 15 जानेवारी 2023 दिसा सकाळीं 10 वरांचेर जातली. हॉटेल ओन्कार ईन हांगच्या आय एन सी सभाघरांत ही कार्यावळ जावपाची आसा. ह्या वेळार आदले आमदार तशेंच मंत्री अॅड. डॉमनीक फर्नांडीस मुखेल सोयरे म्हणून हाजीर आसतले. जाल्यार डॉ. सर्वानंद सावंत देसाय आनी प्रा.(सौ.) मनिषा उपाद्ये/ प्रभूदेसाय मानाचे सोयरे म्हणून हाजीर रावतले.
हे कार्यावळींत फाटल्या म्हयन्यांत घेतिल्ले अखील गोंय कोंकणी कथिका लेखन सर्तीच्या जैतिवंतांक इनामां भेटयतले. तातूंत देविता ईश्वर खुळे (काणकोण), शितल परब (ताळगांव-पणजी), तुलसी पर्येंकार (धावें-तार-सत्तरी), तन्मयी सहकारी (बिम्बल, कुळें), वर्धा शेनाय खांडेपारकार (गोगळ-मडगांव) आनी अनिकेत वांयगणकार (म्हापशें-बार्देस) हांचो आस्पाव आसा. ते भायर केंद्राचे क्रियाशील वांगडी सर्गेस्त राजेंद्र नायक हांचो केंद्रांतल्या ताच्या लांब काळाच्या कर्तव्यनिश्ठ कार्याबद्दल मरणा उपरांतचो सन्मान भेटयतले. ही कार्यावळ सगळ्यां खातीर उक्ती आसा. तेन्ना केंद्राचें बरें मागपी तशेंच हेरांनीय मुजरत येवचें अशी मागणी केंद्र अध्यक्ष मनोहर नायक हांणी केल्या.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
