भांगरभूंय | प्रतिनिधी
पणजी: कोंकणींतली नवी कवयित्री कल्याण सावंत हांच्या ‘काव्यश्री’ ह्या पयल्या वयल्या कविता संग्रहाचो लोकार्पण सुवाळो सांखळेच्या रवीन्द्र भवनांत आयोजीत केला. बुधवार ता. 11 जानेवारीक सकाळच्या 9 वरांचेर ह्या संग्रहाचें लोकार्पण शिक्षिका आनी समाज सेविका सुलक्षणा प्रमोद सावंत हांचे हस्तुकीं जातलें.
कल्याण सावंत एक छंद म्हणून कोंकणींतल्यान काव्यरचना करता आनी तांचें ललीत साहित्य बिम्ब मासिकांतल्यान सातत्यान उजवाडाक येता. सद्या सांखळेच्या साई नर्सींग इन्स्टिट्युट हे संस्थेंत मुख्याध्यापक म्हणून ती काम पळयता. तिणें नर्सींग सेवेंत आसतना व्याख्याती तशेंच सुपरइन्टेंन्ट म्हणून काम केलां आनी त्या काळांत भलायकी विशयाचेर नाटकुलीं बरोवन आकाशवाणी पणजी केंद्रावेल्यान सादर केल्यांत.
तांणी आपल्या जिवितांत घेतिल्ल्या अणभवांचो सार तांच्या कवितांनी नदरेक पडटा. तांचो हो संग्रह बिम्ब हे नामनेचे प्रकाशन संस्थेन उजवाडाक हाडला. ह्या लोकार्पण सुवाळ्या व्हडा संख्येन हाजीर रावपाचो उलो बिम्ब प्रकाशनान दिला.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
