भांगरभूंय | प्रतिनिधी
भांगरभूंय । प्रतिनिधी
फोंडेंः मडकयच्या बार- आम्रे खाजन शेत समितीन फाटल्या 6 वर्सांत 60 लाखां परस चड रुयांचो गैरवेव्हार केल्ल्याचो आरोप आयताराक आयोजीत केल्ले बसकेंत केलो. समितीचो अध्यक्ष पुरुषोत्तम गावडे, सचीव दया नायक आनी भांडारी नारायण गावडे हांणी व्हो आरोप न्हयकारला आनी फुडल्या आठ दिसांत पुराय हिशेब सादर करपाचें उतर शेतकारांक दिलां. बसकेक 150 परस चड शेतकार हाजीर आशिल्ले.
बांदाक खांवटे पडिल्ल्यान पुराय शेतांत खारें उदक रिंगलां. ताचो फटको सुमार 650 शेतकारांक बसला. ताका लागून तिडकल्ल्या शेतकारां समितीची बसका घेतिल्ली. फाटल्या स वर्सां सावन समितीच्या पदाधिकाऱ्यांनी वेवस्थीत हिशेब सादर करूंक नाशिल्ल्यान वाद उप्राशिल्लो. ताका लागून पुलिसांक आपोवचें पडलें शेतकार समिती दर तीन वर्सांनी बदलतात. मात फाटल्या स वर्सां सावन आसा तीच समिती आसा. आयतारचे बसकेंत शेतकारांनी हिशेब मागपाक सुरवात करतगीर पदाधिकाऱ्यांनी तो दिवपाक सुरवात केली. मात तातूंत कांय त्रुटी दिसून आयिल्ल्यान शेतकारांनी गोंदोळ घालपाक सुरवात केली आनी तांणी गैरवेव्हार केल्ल्याचो आरोप केलो.
सचीव दया नायक हाणे दिल्ले म्हायती प्रमाण स वर्सा आदीं नवी समिती वेंचून काडिल्ली. फाटले समितीन 1,03,74,000 रुपये नवे समितीचे सुवादीन केल्ले. बांद सारको करपाक निधी खर्च केलो. सरकारा कडल्यान अनुदान मेळपाचें आसा. बँकेंत 31 लाख आनी 25 लाखांचे फिक्स डिपॉझीट आसा. फुडल्या आठ दिसांत हिशेब सादर करतले अशें तांणे सांगलें. शेतकार समितीन 60 लाख रुपयांचो गैरवेव्हार केला. हिशेंबात जायतो त्रुटी आसात अशें समितीचो आदलो अध्यक्ष भोलू नायक हाणे सांगलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
