भांगरभूंय | प्रतिनिधी
शेकान शेक पातळयल्यात शेंकड्यांनी बेकायदो खाटी
भांगरभूंय । प्रतिनिधी
पेडणें: पर्यटन मोसमांत विठ्ठलदासवाडो मोरजे दर्यादेगेर व्हड प्रमाणांत बिगर गोंयकार वेवसायिकांनी अतिक्रमण केलां. तांणी पर्यटन खात्या कडल्यान कसलेच तरेचे परवाने घेनासतना शेंकड्यांनी लांकडी खाटी, मेजां घातल्यांत. दर्यादेगेचेर केल्ल्या अतिक्रणाचेर कारवाय केले उपरांत तांकां रोखड्योच तांच्यो खाटी, मेजा कश्यो कितें परतून मेळटात, असो प्रस्न थळाव्या लोकांनी उपस्थीत केला.
मोरजी पंचायत वाठारांतल्या विठ्ठलदासवाडो दर्यादेगेर सध्या कांय बिगर गोंयकारांनी खाजगी जमनींत रॅस्टोरंण्ट क्लब उबारल्यात. रॅस्टोरंण्ट क्लबा खातीर दर्यादेगेर लांकडी खाटी घालचे खातीर पर्यटन खात्या कडल्यान परवाने घेवप गरजेचें आसता. पर्यटन खातें ह्या वेवसायिकांक पांच जोडी लांकडी खाटी घालपाची मेकळीक दिता. तशेंच दर्यादेग वाठारांत शॅक वेवसायीक पर्यटन खात्या कडल्यान परवाने घेवन वेवसाय करतात तांकां मात धा जोडी म्हणल्यार 20 खाटी घालपाक मेकळीक दिता. पूण खाजगी जमनी वयल्या शॅक वेवसायीक, रॅस्टोरंण्ट वेवसायिकांनी शेंकड्यांनी लांकडी खाटी घालून पुराय दर्यादेग आडायल्या. खंयच्याय वेळार जर पर्यटक दर्यादेगेर वतले जाल्यार तांकां ह्या खाटींची आडखळ जाता. पर्यटकांचे जावपी हे गैरसोयीचेर पर्यटन खात्यान पुराय आडनदर केल्या, असो आरोप थळाव्या लोकांनी केला.
फाटले खेपे ह्या लाकडी खाटींचेर पर्यटन खात्यान दोन खेपे कारवाय केल्ली. पूण ते उपरांत रोखड्योच त्या वेवसायिकांक त्यो खाटी घरा व्हरून पावयल्यो. हो प्रकार परतून परतून कसो घडटा? पर्यटन खात्याच्या अधिकाऱ्यांचेर राजकी फुडारी वा मंत्री चेपण हाडटात काय कितें, असो दुबाव आतां ह्या वाठारांतले लोक उक्तावपाक लागल्यात.
अतिक्रमण केल्ल्यांचेर कारवाय गरजेचीः कोले
दर्यादेगेर थळाव्या लोकांनी जर लांकडी खाटी घालून वेवसाय केलो जाल्यार त्या लांकडी खाटींचेर, लांकडी स्टॉलाचेर पर्यटन खातें रोखडीच खर कारवाय करता. मात शेंकड्यांनी लांकडी खाटी घालून अतिक्रमण केल्ल्या वेवसायिकांचेर कित्याक कारवाय जायना, असो प्रस्न थळावे जागृत नागरीक संजय कोले हांणी केला. दर्गादेग वाठारांत व्हड प्रमाणांत मसाज करतात. कांय देशी-विदेशी पर्यटक ह्या लांकडी खाटींचेर विसव घेतात. तेच खाटीचेर कांय बायलो आनी दादले क्रॉसींग मसाज पर्यटकांक करतात. ह्या मसाज वेवसायिकांचेर कित्याक कारवाय करिनात, असोय प्रस्न तांणी उपस्थीत केला.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
