भांगरभूंय | प्रतिनिधी
इंडियन सुपर लिंगेंत (आयएसएल) काल येजमान केरळा ब्लास्टर्सान ओडिशा एफसीक 1-0 अशा फरकान हारोवन वट्ट 22 गुणां सयत गुणटक्यांतली तिसरी सुवात मेळयली.
85व्या मिनटा मेरेन मॅच गोलाविणें बादाबाद आशिल्ली. 86व्या मिनटाक ओडिशा एफसीचो गोलकीपर अमरिंदर सिंग कडल्यान एक चूक जाली. केरळा ब्लास्टर्साच्या संदीप सिंगान ही संद सादून हेडरा वरवीं गोल केलो. अखेरेक होच गोल निर्णायक थारलो.
हे लडती पयलीं दोनूय पंगड आयएसएलांत एकामेका आड 19 खेपे एकामेका आड खेळ्ळ्यात. दोनूय पंगडांनी दरेकी स मॅची जिखल्यात. जाल्यार सात मॅची बादाबाद उरल्यात. पूण, केरळा ब्लास्टर्साक ताच्या घरच्या मैदानाचेर हारोवप ओडिसा एफसीक केन्नाच जमूंक ना. पूण, अंदूंच्या हंगामांतली ओडिशा एफसीची कामगिरी बळिश्ट पंगडांक हुस्क्यांत घालपी थारल्या.
तिसऱ्याच मिनटाक रेनिएर फर्नांडीसान येजमान केरळाच्या डिफॅण्डरांक गोंदळांत घाले. फर्नांडीसान मारिल्लो बॉल गोलपोस्टाक आपटून परत आयलो. तो नंदकुमार सेकरा कडेन आयलो. ताचो यत्न गोलपोस्टा वयल्यान गेलो. पूण, हे यत्न केरळाच्या डिफॅण्डरांक विचार करपाक लावपी निश्चीत थारले. 24व्या मिनटाक कार्लोस डेल्गोडोचो ऑन टार्गेट यत्न केरळाचो गोलकीपर प्रभसुखन गिलान सहज रितीन आडायलो. पूण, गिला कडल्यान एक चूक जाली आनी रॅफ्रीन ताका येल्लो कार्ड दाखयलें.
पयल्या अर्दांत दोनूय पंगडांच्या डिफॅण्डरांनी जबरदस्त खेळ केलो. येजमान केरळा ब्लास्टर्स मात्सो चेपणाखाला दिसलो. पयल्या अर्दाच्या खेळांत ओडिशा एफसीचें दालें जड दिसलें. पूण, दोनूय पंगडांक गोल करपाक जमूंक ना.
दुसऱ्या अर्दांत लेगीत दोनूय पंगडांक गोल करपाच्यो संदी मेळिल्ल्यो. पूण, तांकां ताचो फायदो घेवपाक जमलो ना. अखेरेक 86व्या मिनटाक केरळा ब्लास्टर्स आघाडी घेवपाक येसस्वी थारलो. अखेरच्या मिनटां मेरेन केरळान ही आघाडी कायम राखत जैत जोडलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
