भांगरभूंय | प्रतिनिधी
शुभांगी वायंगणकारः शारा भोंवतणच्या सगळ्या पंचायतींक उलो
भांगरभूंय । प्रतिनिधी
म्हापशें: म्हापशें पालिका भोंवतणच्यो पंचायतींतले लोक कोयर हाडून पालिका वाठारांत उडयतात, अशें पालिकेच्या कोम्बींग ऑपरेशनांतल्यान स्पश्ट जालां. ह्या पंचायतींनी आपल्या वाठारांतल्या कोयराच्या वेवस्थापना खातीर यत्न करचे. ते खातीर तांणी सरकाराची मजत घेवची, असो उलो म्हापशेंची नगराध्यक्ष शुभांगी वायंगणकार हांणी मारला.
शेनवारा पालिका कार्यालयांत घेतिल्ले पत्रकार परिशदेंत नगराध्यक्ष वायंगणकार उलयताली. तांचे वांगडा नगरसेवक विराज फडके, साईनाथ राऊळ, डॉ. नूतन बिचोलकार, बार्बरा कारास्को, आशिर्वाद खोर्जुवेंकार, अन्वी कोरगांवकार आनी प्रिया मिशाळ हाजीर आशिल्ली.
भोंलवणच्या पंचायत वाठारांतले लोक रातच्या वेळार कोयर हाडून पालिका वाठारांतल्या रस्त्यां कुशीक उडयतात. ह्या प्रकाराचेर आळाबंद येवचे हे खातीर पालिकेन सध्या खर मोहीम हातांत घेतल्या. शुक्रारा मध्याराती मेरेन पालिकेन कोम्बींग ऑपरेशन चलयलें. तातूंत 45 जाणांचेर दंडात्मक कारवाय करून 1 लाख रुपयांच्या दंडाची वसुली केली, अशी म्हायती नगराध्यक्ष वायंगणकार हांणी दिली.
पालिके वतीन कोयराचें वर्गीकरण करतात. पालिकेचे नितळसाण आनी हेर कर्मचारी म्हापशें शार नितळ दवरचे खातीर मेहनत घेतात. तरी लेगीत रातच्या वेळार कांय बेजापसालदार लोक शारांतल्या ब्लॅक स्पॉटांचेर कोयर हाडून उडयतात. ह्या लोकांक रंगेहात धरचे खातीर हें कोम्बींग ऑपरेशन हातांत घेवपाचो निर्णय घेतिल्लो. हे फुडेंय पालिके वतीन अशी मोहीम चालूच उरतली, अशें नगराध्यक्ष वायंगणकार हांणी सांगलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
