भांगरभूंय | प्रतिनिधी
मुंबय सिटी एफसीन अंदूंच्या आयएसएल हंगामांत अपराजीत माळ कायम राखतना चेन्नयीयन एफसीक हारयलो. मुंबय सिटीन एका गोलान फाटीं पडून लेगीत अखेरेक चेन्नयीयन एफसीक 2-1 असो हारयलो. ह्या जैतान ताणें परतून पयली सुवात मेळयली. पिटर स्लिस्कोव्हीचच्या गोला उपरांत चेन्नयीयन एफसीच्या पंगडांत खोशेयेचें वातावरण आशिल्लें. पूण, चार मिनटांनी मुंबय सिटीच्या लालिंआझुआला छांग्टेन प्रतिस्पर्धी पंगडाक जमनीर हाडलो.
दुसऱ्या अर्दांत ग्रेग स्टिवर्टाच्या गोलान मुंबय सिटी फ्रॅण्ट सिटार आयलो आनी अखेरे मेरेन ही आघाडी कायम राखली. मुंबय सिटीन अंदूंच्या हंगामांत दुसरे खेपे चेन्नयीयन एफसीक हारयलो. पयले लडतींत मुंबयन 6-2 अशा व्हडा फरकान जैत जोडिल्लें. मुंबय सिटीचें अंदूंच्या हंगामांतलें हें सेगीत सवें जैत थारलें. ह्या जैतान ताणें 27 गुणां सयत पयली सुवात मेळयली.
मुंबय सिटीचें अंदूंचें प्रदर्शन पळयलें जाल्यार ताका आडावप चेन्नयीयन एफसीक कठीण थारतलें अशें दिशिल्लें. अखेरेक तशेंच घडले लेगीत.
पयल्या 30 मिनटांच्या खेळांत व्हड कितें अशें घडना अशें दिसता आसतनाच चार मिनटां भितर दोन गोल पडले. 34व्या मिनटाक ज्युलियस ड्युकेरच्या पासाचेर पिटर स्लिस्कोव्हिचान गोल करून चेन्नयीयनाक आघाडी मेळोवन दिली. 38व्या मिनटाक येजमान पंगडान बरोबरीचो गोल केलो.
दुसऱ्या अर्दांत मुंबय सिटीन आघाडी घेवपाक नेटाचो यत्न केलो. ताचो ताका 57व्या मिनटाक फायदो जालो. 64व्या मिनटाक चेन्नयीयनाक बरोबरीची संद आशिल्ली. अनिरुद्ध थापान गोल करपाची सोंपी संद वगडायली.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
