भांगरभूंय | प्रतिनिधी
येजमान बांगलादेश पंगडान भारताक दुसरे टॅस्टीच्या तिसऱ्या दिसा जैता खातीर 145 धांवड्यांची मोख दिली. पूण, बांगलादेशाचो स्पिनर मेहदी हसन मिराजान भारताचो टॉप ऑर्डर फकत 45 धांवड्यांचेर तंबूंत धाडलो. ताका लागून ही मॅच उमळशीक वाडोवपी थारल्या.
मेहदीन शुभमन गील (7), चेतेश्वर पुजारा (6) आनी विराट कोहली (1) हांची शिकार केली. शाकिब अल हसनान मुखेली लोकेश राहुलाक बाद केलो. भारताक जैता खातीर आनीक 100 धांवड्यांची गरज आसा. अक्षर पटेल 26 जाल्यार नायट वॉचमॅन जयदेव उनाडकट 3 धांवड्यो करून खेळपट्टीचेर आसा.
ते पयलीं भारतान बांगलादेशाचो दुसरो डाव 231 धांवड्यांचेर गुठलायलो. बांगलादेशा वतीन लिटन दास (73) आनी झाकीर हसन (51) हाणें संयमान बॅटींग करून भारता मुखार जैता खातीर 145 धांवड्यांची मोख दवरली. पूण, भारताच्या दुसऱ्या डावाची सुरवात बाबत जाली.
बांगलादेशान तिसऱ्या दिसा बिनबाद 6 धांवड्यां वयल्यान मुखार व्हेलो. भारतान पयल्या डावांत 87 धांवड्यांची आघाडी घेतिल्ली.
भारताच्या उमेश यादव, आर आश्विन आनी उनाडकट हांणी बांगलादेशाची अवस्था 3 बाद 51 अशी केली. ते उपरांत अक्षर पटेलान मुशफिकूर रहिमाक 9 धांवड्यांचेर बाद केलो. मजगतीं, झाकीर हसन आनी लिटन दास हांणी भारताच्या बॉलरांचो प्रतिकार करपाचो यत्न केलो. पूण, हो यत्न उमेश यादवान मोडून उडयलो. ताणें झाकीराक 51 धांवड्यांचेर बाद केलो. ते उपरांत अक्षर पटेलान मेहदी हसन मिराजाक शुन्याचेर बाद बांगलादेशाची स्थिती 6 बाद 113 अशी केली.
ते उपरांत लिटन दास आनी नुरुल हसन हाणें भागिदारी करून भारताक दुसऱ्या डावांत आव्हात्मक मोख दिवपाचो यत्न केलो. पूण, अक्षर पटेलान नुरुल हसनाक 31 धांवड्यांचेर बाद करून बांगलादेशाक सातवो धपको दिलो. बाद जावचे पयलीं ताणें सातवे विकेटी खातीर 46 धांवड्यांची भागिदारी केली. मजगतीं, च्या च्या विसवा मेरेन लिटन दासान अर्द शेंकड्याची खेळी करीत बांगलादेशाक 195 धांवड्यां मेरेन पावयलो.
च्या च्या विसवा उपरांत लिटन दास आनी टस्कीन अहमद हांणी आठवे विकेटी खातीर 60 धांवड्यांची भागिदारी करून बांगलादेशाचो स्कोर 200 वयर पावयलो. अखेरेक मोहम्मद सिराजान लिटन दासाक 73 धांवड्यांचेर बाद केलो. दास बाद जाल्या उपरांत बांगलादेशाचो डाव रोकडोच सोंपतलो अशें दिशिल्लें. पूण, टस्कीन अहमदान आक्रमक शॉर्ट्स मारून बांगलादेशाक 231 धांवड्यां मेरेन पावयलो. अखेर खलील अहमद 4 धांवड्यांचेर बाद जालो आनी बांगलादेशाचो डाव 231चेर सोंपलो. टॅस्कीन अहमद 31 धांवड्यांचेर नाबाद उरलो
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
