भांगरभूंय | प्रतिनिधी
मुख्यमंत्री डॉ. सावंतः गोंयांत फिनिशींग स्कूल संकल्पना सुरू करपाची येवजण
भांगरभूंय । डीआयपी
पणजीः गोंयाक शिक्षणीक हब करपाची मोख पुराय करपाचे दिशेन सरकारान गरजेचीं पावलां उखल्ल्यांत. शिक्षणीक हब करचे खातीर गरज आशिल्ल्या साधन सुविधांचे उदरगतीचेर भर दिला. राज्यांत स्टार्टअप आनी इनोव्हेशनाक उर्बा दिवचे खातीर सरकारान येवजण सुरू केल्या, अशें मुख्यमंत्री डॉ. प्रमोद सावंत हांणी सांगलें.
शिरोडेंच्या श्री रायेश्वर इन्स्टिट्यूट ऑफ इंजिनियरींग अँड इन्फोर्मेशन टेक्नॉलॉजीच्या आदल्या विद्यार्थी मेळाव्यांत मुख्यमंत्री मुखेल सोयरे म्हूण उलयताले. कार्यावळीक शिंपणावळ मंत्री आनी शिवग्राम एज्युकेशन सोसायटीचे अध्यक्ष सुभाष शिरोडकार हाजीर राविल्ले.
देशांतल्या दरेका नागरिकाक दर्जेदार शिक्षण दिवपाचो प्रधानमंत्री नरेंद्र मोदी सेगीत यत्न करता. इतिहासांत पयलेच खेपे प्रधानमंत्र्यान देशांत कुशळटाय उदरगत मंत्रालयाची थापणूक करून कुशळटाय उदरगतीचेर भर दिला. गोंय सरकारान गोंयांत कुशळटाय उदरगती खातीर खूबशे उपक्रम चालीक लायल्यात. तशेंच गोंयांत रोखडेंच फिनिशींग स्कूल संकल्पना सुरू करपाची येवजण आसा, अशें मुख्यमंत्री डॉ. सावंत हांणी सांगलें.
गोंयचे उदरगती खातीर आनी गोंयची प्रतिमा संवसारा मुखार व्हड करपा खातीर विवीध मळांचेर काम करपी आदल्या विद्यार्थ्यांनी गोंयचे उदरगतींत योगदान दिवचें, असो मुख्यमंत्री डॉ. सावंत हांणी उलो मारलो.
विवीध मळांचेर आपली कारकीर्द घडोवपी आतल्या अभियांत्रिकी विद्यार्थ्यांक मंत्री शिरोडकार हांणी परबीं दिली. गोंयचे उदरगतीक दरेकल्यान आपलें योगदान दिवपाची गरज आसा. गोंयांतल्या उच्च शिक्षण संस्थांनांतल्यान चडांत चड विद्यार्थ्यांनी शिक्षण पुराय करून आपलें आनी गोंयचें नांव वयर काडचें, अशेंय तांणी सांगलें.
एमेरिटसचे अध्यक्ष नितीन कुंकळ्येंकार हांचेंय ह्या वेळार उलोवप जालें.
ह्या वेळार मुख्यमंत्री डॉ. प्रमोद सावंत हांचे हस्तुकीं आपले कारकिर्दींत येस मेळयिल्ल्या आदल्या विद्यार्थ्यांक पुरस्कार भेटयले. आदल्या विद्यार्थी संघटणेचे अध्यक्ष अश्वीन कुंकळ्येंकार, संस्थेचे संचालक सचीन शिरोडकार, डॉ. गौरी शिरोडकार आनी हेर मानेस्त कार्यावळीक हाजीर राविल्ले.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
