भांगरभूंय | प्रतिनिधी
आरोग्यम धनसंपदा ही एक पोरणी म्हण आसा. आमचें आरोग्य हीच आमची धनसंपत्ती. जर आमी ही संपत्ती बरे तरेन दवरली जाल्यार आमचो संवसार सुखी जातलो. मनशाच्यो सगल्यो गरजो पुराय करपा खातीर शरीर निरोगी आसप गरजेचें आनी शरीर निरोगी दवरपा खातीर आमचें मन निरोगी आसप भोव गरजेचें. आयच्या काळांतली आमची जगपाची पद्दत जायत्या दुयेंसांक आमंत्रण दिता. सद्याच्या धकधकीच्या आनी मानसीक तणावाच्या जिवनाक लागून मनशांक जायतीं दुयेंसां जातात. समाजीकता, मानसीकता आनी शारिरीकता मनशाचे भलायकेक दर्शायता. मनीस जर शारिरीक रुपान योग्य ना जाल्यार ताका लोकांचेर अवलंबून रावचें पडटा. चड वेळ बसून काम करप, त्या खातीर वाडिल्लें वजन जेवणाची आबाल ह्या गजालींचो आमच्या जिवनशैलीचेर वायट परिणाम जाता.
दर एकल्याचें शरीर आनी मन जर स्वस्थ आसत जाल्यार ताका कसल्याच त्रासाची जाणीव जायना. तो आपलें काम खोशयेन करता ताकाच आरोग्य म्हणटात. त्या उलट जर आमी अस्वस्थ आसत जाल्यार आमचें पुराय लक्ष आमच्या शरिराचेर आनी मनाचेर आसता आनी कामांत लक्ष लागना. ताका लागून आमच्या शरिराक आनी मनाच्या आरोग्याक जें जें कितें गरजेचें आसा तें आमी आपणावपाक जाय. आयच्या काळांत वचत थंय स्पर्धा, केन्ना दीस उजवाडटा आनी केन्ना दीस मावळता हें सुद्दा कळना. फक्त काम आनी काम. चड पयसो कसो कमोवपाचो हाच्या फाटल्यान मनीस धांवता. ह्या खातीर आमच्या आरोग्याचेर दुर्लक्ष जाता. आमी आमच्या आरोग्याची जतनाय घेवपाक जाय जातूंत आमची आनी आमच्या कुटुंबाची भलायकी आसा.
शारिरीक भलायके परस मानसीक भलायकी बरी आसप भोव गरजेची कारण खूबशीं दुयेंसां मानसीक भलायकी बरी नाशिल्ल्यान जाता. मानसीक आरोग्य सुदारलें म्हणटकच मनीस समाधानी आनी आनंदी जाता. ताचो विचार करपाचो दृश्टीकोन बदलता. शरीर हें एक यंत्र तें सतत चलत रावपाक जाय. त्याभायर वेवस्थीत व्यायाम, तरे तरेचे खेळ खेळप ह्यो गजाली खूब गरजेच्यो. भरपूर उदक पिवप, संतुलीत आहार घेवप हें सुद्दा खूब गरजेचें. पोटभर जेवलीं म्हणटकच आमकां आळस आनी सुस्ती येता आनी न्हीद येता. आयच्या काळांत जायत्या लोकांक काळजाचें दुयेंस, गोडेंमूत, कॅन्सर सारकीं दुयेंसां जातात. ह्या लोकांक तर आयुश्यभर वखदां घेवचीं पडटात.
स्वताचें भविश्य दुयेंसांत वच्चें न्हय जाल्यार जण एकल्यान आपले भलायकेची काळजी घेवप हें खूब गरजेचें. बरी भलायकी आसली जाल्यार आनंद तर मेळटाच पूण आपलो छंद आनी आपली आवड जपपा खातिरुय खूब वेळ मेळटा. आजकाल खूबशे लोक वायट व्यसनां करतात आनी आपली भलायकी इबाडटात. आमकां जर उज्वल भविश्य जाय जाल्यार कसल्याच वायट व्यसनाचें सेवन न करता आमी आमची भलायकी सांबाळपाक जाय. आयुश्यांत मेळिल्ल्यो गजाली भोगपा खातीर आमकां बरी भलायकी जाय. शारिरीक आरोग्या बरोबर मानसीक आरोग्य लेगीत मनशाचे जिणेक खूब उर्बा हाडटा. मनीस सदांच आनंदी उरता. जेन्ना मनीस आपली भलायकी बरे तरेन जपता तेन्ना ताका कळटा की खरेच पयशा परस बरी भलायकी खूब गरजेची. खूबशा वेळा पयशे आसून लेगीत ताचो कांयच फायदो जायना. पयशे तर आसतात पूण दुयेंसां खातीर वखद आसना. ताका लागून, आरोग्यम धनसंपदा ही आमची खरी संपत्त्ती.
त्रिवेणी धारगळकार
इकरावी यत्ता, विज्ञान शाखा, गार्डियन
एंजल उच्च माध्यमीक विद्यालय,कुडचडें
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
