भांगरभूंय | प्रतिनिधी
हालींच्या 25 वर्सांच्या काळांत आमचें गोंय तशें बरेंच सुदारलां. भोवतेकांच्या हातांत पयसो घोळपाक लागला. म्हारगाय बरीच वाडिल्ल्यान जोडटा तितलें पावना, ही गजाल खरी. तरीय आमचे गोंयकारांचे घराबे ‘खावन- जेवन सुखी’ म्हणपाचे. हेर समस्या आसात. पूण, आमी तशें सुशेगाद, पोब्र फिदाल्ग. पोट भरपाक एका काळार गोंयकार ‘गल्फा’क वताले, तशे आतां हेर राज्यांतले लोक गोंयांत येतात. कश्ट करप्यांक हांगा मरण ना. गोंयांतलें राहणीमानूय हेर राज्यां परस बरेंच फुडारिल्लें, देखून हांगा आयिल्लो कोणूच उपाशी उरना. दरेका गोंयकाराच्या घरांत सगल्यो सुखसुविधा आसात. दारांत उण्योच तीन गाडयो उब्यो आसतात. हातांत पयसो, सत्ताधिशां कडेन वळखी म्हणटकच कायदो मोडपाकूय आमी फाटीं नात. फाटल्या दोन दिसांनी पुलिसांनी लायसन्स नासतना गाडयो चलोवपी पन्नासां वयर भुरग्यांचेर कारवाय केली. म्हणल्यार ते चलयतात, त्या गाडयांच्या धनयांक 10 हजारांचो तालांव घालो. तांचेर गुन्यांवूय दाखल केला. ही मोहीम सदांच चालीक लागपाक जाय. कारण उदक गळ्या मेरेन आयलां. हालींच ह्याच स्तंभांत म्हणले प्रमाण, दरवर्सा गोंयांत 250 वयर लोक रस्तो अपघातांत मरतात.
वाळपय आनी बार्देशांत मेळून पयर 64 जाणांचेर कारवाय जाल्या. हे सगले भुरगे नेण्टे. म्हणल्यार १८ वर्सां पिराये सकयले. तांचे कडेन गाडी चलोवपाचो परवानो ना. तरीय ते दुचाकी, चार चाकी घेवन मेळत थंय झेतान हेडटात, हाका कितें म्हणपाचें? मुख्यमंत्र्यान हालींच सान भुरग्यांच्या हातांत गाडयो दिवच्यो न्हय, अशी विनवणी केल्ली. तसो कायदोय आसा. मात, ख्यास्त जायना तो मेरेन ताका कोण पाळो दिना. सान भुरगे गाडी चलयतना दिसल्यार तांच्या बापायक भितर उडयतले, अशी खबर आयिल्ली आसतना बरेचजाण सगलें नेम, कायदे खुटयाळ्याक लावन गाडयो चलयताले. अखेरेक पुलिसांक कारवाय करची पडली. गोंयांत अपघात वाडल्यात, हेंय दिसाळीं वाचल्यार कळटा. मेळत थंय सद्दां येरादारीची कोंयडीय जाता. तातूंत हे लायसन्स नासतना गाडयो दामटूपी भुरगे. जांकां धरल्यात, तांची पिराय उणी आशिल्ल्यान अटक करपाक मेळना. मात, वाहन धनयाक अटक करूं येता. परत सांपडत जाल्यार अटक करतले, अशें पुलिसांनी सांगलांच. कोणाचेरुय गुन्यांव दाखल जालो वा कसलेंय संकश्ट मुखार उबें जालें काय सगल्यांत पयलो फोन वता तो राजकी फुडाऱ्यांक. भुरग्यांच्यो दुचाकी, गाडयो जप्त करतकच काचाबूल जाल्ल्या पालकांनी तांकां फोन केले. मात, लोकप्रतिनिधींनी तें व्हडलेशें मनार घेवंक ना. पुलिसांनीय भियेनासतना कारवाय चालूच दवरली. ही मोहीम कायम चालूच दवरपाक जाय. कारण अपघातांचेर नियंत्रण येवपाची गरज आसा.
दुसरी म्हत्वाची गजाल म्हणल्यार, मरप्यां मदीं चडशे तरणाटेच आसतात. अपघाता फाटल्यान फक्त लायसन्स नासप हेंच कारण ना. तर येरादारी नेम पाळप ना, रस्त्यांची आवतिकाय, रस्ताद गोरवां, वाडिल्ली येरादारी हाकाय लागून अपघात वाडल्यात. विशी, पंचविशींतले तरणाटे मरप हाचो संबंदीत कुटुंबाचेर कितलो परिणाम जाता, हें वेगळें सांगपाक नाका. फकत मरणांच न्हय, तर जखमी जावन कायमचे अपंगुळ जाल्लेय तरणाटे आसात. ताका सांबाळपाक दुसरो मनीस जाय पडटा. तरणाटे मरप म्हणल्यार देशाचो फुडार काबार जावप, अपंगुळ जावप. आमी कितलो तेंप हें जावपाक दितले? सरकारी यंत्रणेन सगल्या गजालींचो विचार करून बेकायदेशीरपणान गाडयो चलोवपी सगल्यांचेरूच कारवाय करूंक फावो. पुलीस यंत्रणा पावनां थंय सीसीटीव्ही कॅमेऱ्याची मजत घेवं येता. गाडयो कश्या कश्योय चलोवप हें स्वताक घातकूच, पूण दुसऱ्या वाहनचालकाकूय ताची कांयच चूक नासतना त्रासांत घालप.
लायसन्स नासतना चलोवपी भुरग्यांक धरचेच, पूण वेगान गाडयो चलोवप्याचें कितें? तांकां फक्त तालांव दिवन उपकारचेंना, तर जल्माची अद्दल घडटली, हे खातीर पावलां उखलप गरजेचें. येरादारी पुलिसांनी आतां वाडट्या अपघातांत आळा घालपाक ही मोहीम कायम चलोवची पडटली. तीय बी फक्त शारांतूच न्हय, तर पुराय राज्यांत. खास करून आयतार वा सुटयेच्या दिसा. ते दीस पुलीस नासतात, हाची खात्री आशिल्ल्यान बरेच भुरगे गाडयो भायर काडटात….. आनी पालकांनीय आपल्या भुरग्यांचे फाजील लाड करचे न्हय. गाडी चलोवप ही काळाची गरज जाल्या. मान्य, पूण ते खातीर भुरग्यांक 18 वर्सां तरी जावंदी.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
