भांगरभूंय | प्रतिनिधी
भांगरभूंय । प्रतिनिधी
वाळपयः सत्तरी तालुक्यांत कोपर्डें हांगा रानवटी जनावरांचो कास करपा खातीर लायिल्ल्या फासांस एक बिबटो वाघ सांपडून ताका मरण येवपाची घडणूक जाली. राना खात्यान हाची गंभीर दखल घेवन जे कडेन हो फांस लायिल्ल्या थंयच्या जमीन धनयांचेर तांणी गुन्यांव नोंद केला. फांस कोणे लायिल्लो हाचो सोद घेवपाचे काम राना अधिकाऱ्यांनी सुरू केलां. राना खात्याचे मंत्री विश्वजीत राणे हांणी ज्या कोणे हें काम केलां ताका सोदून काडून ताचेर खर कारवाय करपाचो आदेश अधिकाऱ्यांक दिला.
कोपर्डे हांगा रस्त्याचे कुशीक रानवटी जनावरां खातीर, चड करून रान दुकरां खातीर हो फांस लायिल्लो. तातूंत बिरेस्तारा रातयां वा शुक्राराक फांतोडेर बिबटो सांपडलो. शुक्राराक सकाळीं कांय लोकांचे नदरेक हो प्रकार पडटकूच तांणी राना खात्याच्या वाळपयच्या कार्यालयाक ताची म्हायती दिली. आरएफओ शामसुंदर गांवस आनी महादेव गांवकार हांणी घडणुकेचे सुवातेर येवंन घडणुकेचो पंचनामो केलो. मेल्ल्या बिवट्याक वाळपयच्या कार्यालयांत व्हेलें. थंय पशू वैजकीय अधिकाऱ्यान पोस्टमॉर्टेम केल्या उपरांत बिवट्याचो विलो लायलो.
रानवटी जनावरां खातीर इस्मानी शेख सायराबानो तालब हाचे जमनीन व्हो फांस लायिल्लो अशी म्हायती सहाय्यक उपवनपाल विश्वास चोडणकार हांणे दिली. तालब हाचेर गुन्यांव नोंद केला. तागेल्या दोनूय चल्यांक जबानी खातीर आपयलां. हो प्रकार सामको गंभीर आशिल्ल्यान तो जांणी केला तांचेर कारवाय करपा विशीं कसलीच हयगय करचे नात अशें चोडणकारान सांगलें.
सत्तरींत जायते कडेन फांस लावन रान दुकोर, मेरू, चितळां, हरणांचो कास करपाचे प्रकार वाडपाक लागल्यांत. कोपर्डें हांगा ह्याच कारणा खातीर फांस लायिल्लो. राना खात्यान चवकशी सुरू केल्या. दुबावीत म्हणून कांय जाणांची नांवा खात्या कडेन आयल्यात. पुरावे मेळटगीर तांका अटक करतले अशें तांणी सांगले.
सोद मोहीम सुरू
कोपर्डें हांगा फासांत सांपडून बिबटो मरपाचें प्रकरण राना खात्यान गंभीरपणान घेतलां. फांस लायिल्ल्यांचो सोद घेवपाची मोहीम तांणी सुरू केल्या. ते खातीर जायत्या कर्मचाऱ्यांची नियुक्ती केल्या. वेगवेगळ्या पंगडा वतीन दुबावितांचो माग काडपाचो काम हातांत घेतलां. सोद मोहिमेचो रानवटी जनावरांक त्रास जावचो ना हाची जतनाय घेतल्या. जांचे जमनींत फांस लायतात त्या जमीन धनयांयेर फुडाराक कारवाय करपाचे संकेत राना अधिकाऱ्यांनी दिल्यात.
प्रकार दुर्दैवी- विश्वजीत
रानवटी जनावरां खातीर फांस लावत आनी तातूंत सांपडून बिबटो मरण ही सामकी दुर्दैवी घडणूक आसा. जे कोण हातूंत घुस्पल्यात तांकां सोडचे नात अशे राना खात्याचे मंत्री विश्वजीत राणे हांणी सांगलां. रानवटी जनावरांक धरपाक फांस लावपाचे प्रकार गोंयांतल्या रानां वाठारांत जातात. बिबटो प्रकरणाची खोलायेन चवकशी करून अहवाल सादर करपाचो आदेश हांवे रानां अधिकाऱ्यांक दिला अशें पणजे पत्रकारां कडेन उलयतना तांणी सांगलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
