भांगरभूंय | प्रतिनिधी
जमशेदपूराच्या कीनन स्टेडियमाचेर चालू आशिल्ले रणजी करंड सर्तींतल्या क गटांतले मॅचींत येजमान झारखंड पंगडान गोंया आड पयल्या डावाच्या आदाराचेर 24 धांवड्यांची आघाडी घेतली.
झारखंडान पयल्या डावांत काडिल्ल्या 386 धांवड्यांचो फाटलाव करपी गोंयचो पयलो डाव 134.3 ओव्हरींनी 362चेर सोंपलो. विकेटकीपर बॅट्समन एकनाथ केरकारान 73 आनी दर्शन मिशाळान 71 धांवड्यांची खेळी केली.
ते पयलीं तिसऱ्या दिसा गोंयान 4 बाद 99 धांवड्यां वयल्यान मुखार खेळपाक सुरवात केली. स्नेहल कवठणकार आनी सिद्धेश लाड हांणी संयमान बॅटींग करून गोंयाक बरे स्थितींत हाडपाचो यत्न केलो. पूण, पंगडाच्या खात्यांत 31 धांवड्यांची भर पडता थंय आसा. स्नेहलाच्या रुपान गोंयाक पांचवो धपको बसलो.
स्नेहल बाद जाल्या उपरांत लाडान एकनाथ केरकारा वांगडा मेळून गोंयचो डाव परतून सांबाळपाचो यत्न केलो. ही जोडी गोंयाक संकश्टांतल्यान भायर काडटली अशें दिसता आसतना सिद्धेश लाड वैयक्तीक 33 धांवड्यो करून तंबूंत परतलो. सवी विकेट 160चेर पडल्या उपरांत गोंयाक 200चो लेगीत आंकडो हुपपाक जमचो ना अशें दिशिल्लें. पूण, एकनाथ आनी दर्शन मिशाळ हांणी डावाक आकार दिलो. दोगांयनी मेळून सातवे विकेटी खातीर शेंकड्याची भागिदारी करून गोंयाक परतून मॅचींत हाडलो. दोगांयनी 221 बॉलांनी 112 धांवड्यांची भागिदारी केली. दोगांयनी आपले अर्द शेंकडो पुर्ण करपा खेरीत गोंयचो डाव 250च्या मुखार व्हेलो.
गोंय ल्हवल्हव मॅचीचेर नियंत्रण मेळयता अशें दिसता आसतना झारखंडान परतून गोंयाक बॅकफुटाचेर धुकल्लो. झारखंडाचो बॉलर नदीमान एकनाथाक बोल्ड करून ही भागिदारी फोडली.
एकनाथ बाद जाल्या उपरांत परतून गोंयचो डाव गडगडलो. कांय प्रमाणांत मोहित रेडकारान संघर्श केलो. पूण, तो 39 धांवड्यो करून बाद जालो. ते उपरांत दर्शन 71 धांवड्यांचेर एलबीडब्ल्यू जालो. अशे तरेन गोंयान 362चेर आपल्यो सगल्यो विकेटी वगडायल्यो.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
