भांगरभूंय | प्रतिनिधी
डॉ. देविया राणेः अडवयच्या सरकारी माध्यमीक विद्यालयाचो खेळां महोत्सव उमेदीन
भांगरभूंय । प्रतिनिधी
वाळपयः खेळ आमचे खातीर खूब फायद्याचे आसात. कारण ते वेळाचें बंधन, धिटाय, शिस्त, गटांनी काम करपाक शिकयतात. खेळ आत्मविस्वास वाडयता आनी तातूंत सुदारणा करपाक शिकयतात. खेळाचो नेमान सराव केलो जाल्यार आमी अदीक सक्रीय आनी निरोगी रावपाक शकतात, अशें पर्यें मतदारसंघाची आमदार डॉ. देविया राणे हांणी सांगलें.
अडवय सत्तरीच्या सरकारी माध्यमीक विद्यालयाच्या खेळा महोत्सवाच्या उक्तावण सुवाळ्यांत डॉ. राणे उलयताली. ह्या वेळार भिंरोंडेचे सरपंच उदयसिंह राणे, व्हॉलीबॉल प्रशिक्षक रामा धावस्कार, अडवय सरकारी माध्यमीक विद्यालयाची मुख्याध्यापक आजरा अन्सारी, पालक शिक्षक संघाचे अध्यक्ष महादेव गावडे हाजीर आशिल्ले.
खेळ खेळिल्ल्यान एका मनशा खातीर खूब फायद्याचें थारपाक शकतात. ते शारिरीक शक्त दिवपा वांगडाच मानसीक सामर्थ्य वाडयता. फुटबॉल, हॉकी, व्हॉलीबॉल, बेसबॉल, क्रिकेट, टेनीस, खो-खो, कबड्डी हे सारकिल्ले मैदानी खेळ शारिरीक आनी मानसीक भलायकी सुदरयता. घरांत खेळपा सारकिल्ले खेळ, देखीक बुद्दीबळ, सुडोकू हे मानसीक नदरेन सक्षम करतात, एकाग्रता वाडयतात. हेच खातीर खेळ आमचे जिणेंत खूब म्हत्वाचे आसात, अशें डॉ. राणे हांणी सांगलें.
उदयसिंह राणे हांणी सांगलें, अडवय माध्यमीक विद्यालयाचो शालेय निकाल फाटल्या कांय वर्सां सावन दर्जात्मक लागता. विद्यालयाचे शिक्षक, पालक आनी विद्यार्थी हांच्या एकवटीत यत्नांक लागून हे येस मेळटा. फुडारांत लेगीत विवीध उपक्रमांच्या माध्यमांतल्यान भुरग्यांचे सर्वांगी उदरगतीचेर भर दिवचो. पंचायती वतीन सगळे तरेची मजत दिवपाचें आस्वासन सरपंच राणे हांणी ह्या वेळार दिलें.
विद्यालया सतावपी साबार समस्या पयस करचे खातीर आमदार डॉ. राणे बांदील आसात. कसलेच तरेची समस्या उप्रासची न्हय हे खातीर ती विशेश जतनाय घेता. ताका लागून विद्यालयाच्या शिक्षकांनी गरजे वेळार तांचे कडेन संपर्क करचो, अशेंय सरपंच राणे सुचयलें.
आजरा अन्सारी हांणी सांगलें, दर वर्सा विद्यालय खेळां महोत्सव मनयता. हालींच बाल आनंद मेळावो घडोवन हाडिल्लो. आनंददायी शिक्षण दिवपाची प्रक्रिया ह्या विद्यालयांत नेमान चलता, ताका लागून विद्यालयाचो शिक्षणीक निकाल बरो लागता.
शिक्षिका विद्या गणपुले सुत्रसंचालन केलें. शिक्षिका शंभा गावडे हांणी उपकार मानले. ह्या खेळां महोत्सवांत विवीध तरांचे सांघीक आनी वैयक्तीक खेळ घेतले.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
